ການຄ້າ ນວ ເນັ້ນບໍ່ໃຫ້ຊາວຄ້າຂາຍສວຍໂອກາດຂື້ນລາຄາສິນຄ້າ ຫລື ກັກຕຸນສິນຄ້າ

ທ່ານ ນັນຕາ ສານຸວົງ ຮອງພະແນກອຸດສາຫະກຳ ແລະ ການຄ້າ ນວ ໃຫ້ສຳພາດວ່າ ບໍ່ໃຫ້ຊາວຄ້າຂາຍສວຍໂອກາດຂື້ນລາຄາສິນຄ້າ ຫລື ກັກຕຸນສິນຄ້າ, ລວມເຖີງໃຫ້ມີມາດຕະການປ້ອງກັນພະຍາດໂຄວິດ-19 ທີ່ດີ ໃນໄລຍະສະເຫລີມສະຫລອງບຸນປີໃໝ່ລາວ ປະຈໍາປີ ພສ 2565 ທີ່ຈະມາເຖີງນີ້ ໂດຍຈະມີມາດຕະການຢ່າງເຂັ້ມງວດຕໍ່ຜູ້ລະເມີດ

ຄະນະຂອງພະແນກອຸດສາຫະກຳ ແລະ ການຄ້າ ນະຄອນຫລວງວຍຽງຈັນ ນຳໂດຍທ່ານ ນັນຕາ ສານຸວົງ ຮອງພະແນກອຸດສາຫະກຳ ແລະ ການຄ້າ ນວ ໄດ້ລົງຊຸກຍູ້ ແລະ ຢ້ຽມຊົມບັນຍາການການຊື້-ຂາຍສິນຄ້າຢູ່ຕະຫລາດລາວ ຂາຍຍົກ-ຂາຍຍ່ອຍ, ບ້ານສະພັງເມິກ, ເມືອງໄຊທານີ, ນວ ໂດຍການຕ້ອນຮັບຂອງທ່ານ ບຸນທ່ຽງ ລັດຕະນະວົງ ອຳນວຍການຕະຫລາດລາວ. ໂອກາດທີ່ລົງຊຸກຍູ້ ແລະ ຢ້ຽມຊົມບັນຍາກາດການຊື້-ຂາຍໃນຄັ້ງນີ້ ທ່ານ ນັນຕາ ສານຸວົງ ໄດ້ໃຫ້ສຳພາດວ່າ: ມາດຕະການທີ່ປະຕິບັດ ເລີ່ມຈາກການອອກແຈ້ງການ ສະບັບເລກທີ 0496/ອຄ.ນວ.ຄພນ, ລົງວັນທີ 21 ມີນາ 2022 ເຖີງຫົວໜ້າຫ້ອງການອຸດສາຫະກໍາ ແລະ ການຄ້າ 9 ຕົວເມືອງ, ລວມເຖີງສູນການຄ້າ, ຊູບເປີ້ມາເກັດ, ຮ້ານສະດວກຊື້, ຫົວໜ່ວຍທຸລະກິດຈັດສັນຕະຫລາດ, ຜູ້ປະກອບທຸລະກິດ ແລະ ຊາວຄ້າຂາຍ ບໍ່ໃຫ້ສວຍໂອກາດຂຶ້ນລາຄາສິນຄ້າຕາມລໍາພັງໃຈ ໃນໄລຍະສະເຫລີມສະຫລອງບຸນປີໃໝ່ລາວ ປະຈໍາປີ ພສ 2565 ໂດຍໄດ້ກໍານົດລາຄາຂາຍຍ່ອຍ ປະເພດຊີ້ນໝູ, ເຂົ້າ ແລະ ປານິນກະຊັງ ເຊີ່ງນອນຢູ່ໃນໝວດສິນຄ້າທີ່ລັດຄຸ້ມຄອງ ຄື: ລາຄາຊີ້ນໝູ: ປະເພດ 1: ສູງສຸດບໍ່ໃຫ້ເກີນ 50.000 ກີບ/ກິໂລ ແລະ ປະເພດ 2: ສູງສຸດບໍ່ໃຫ້ເກີນ 46.000/ກິໂລ, ລາຄາເຂົ້າ: ລາຄາຂາຍຍ່ອຍເຂົ້າສານໜຽວ ປະເພດ 2: ສູງສຸດບໍ່ໃຫ້ເກີນ 7.400 ກີບ/ກິໂລ, ລາຄາປານິນກະຊັງ: ສູງສຸດບໍ່ໃຫ້ເກີນ 20.000 ກີບ/ກິໂລ

ຢ່າງໃດກໍຕາມ, ທ່ານຝາກມາຍັງສັງຄົມ ກໍຄື ຊາວນະຄອນຫລວງວຽງຈັນ ກ່ຽວກັບລາຄາສິນຄ້າຕາມທ້ອງຕະຫລາດທີ່ມີທ່າອ່ຽງເພີ່ມຂຶ້ນ ແມ່ນເກີດຈາກຫລາຍປັດໃຈທີ່ສົ່ງຜົນກະທົບເຮັດໃຫ້ໂຄງປະກອບລາຄາສິນຄ້າ ຕົ້ນທຶນເພີ່ມຂຶ້ນ ເປັນຕົ້ນ: ລາຄານໍ້າມັນເຊື້ອໄຟເພີ່ມຂຶ້ນ, ອັດຕາແລກປ່ຽນເງິນຕ່າເພີ່ມຂຶ້ນ ແລະ ອື່ນໆ. ຖ້າພົບກໍລະນີຖືກຊາວຄ້າຂາຍເອົາປຽບ ແມ່ນສາມາດໂທຫາສາຍດ່ວນ ໝາຍເລກ 1510 ຫລື ໂທຫາເຈົ້າໜ້າທີ່ກ່ຽວຂ້ອງຂອງພະແນກອຸດສາຫະກຳ ແລະ ການຄ້ານະຄອນຫລວງວຽງຈັນ ຕາມ ໝາຍເລກທີ່ຕິດໄວ້ຢູ່ຕາມແຕ່ລະຕະຫລາດ ເພື່ອໄປແກ້ໄຂໃຫ້ທັນກັບສະພາບການ.

ຂ່າວ: ຕະວັນ

ພາບ: ສັກ