ກອງບັນຊາການທະຫານ ເມືອງຫາດຊາຍຟອງ ນະຄອນຫຼວງວຽງຈັນ ຈັດກອງປະຊຸມສະຫຼຸບວຽກງານຮອບດ້ານປະຈໍາປີ 2021 ເຊິ່ງສາມາດຢຶດຢາບ້າໄດ້ 10 ເປົາ ຢາໄອ້ 9 ຖົງ ກັບ 1 ຫຼອດ ນອກນັ້ນຍັງກັກຕົວຄົນຮ້າຍໄດ້ 189 ຄົນມາສຶກສາອົບຮົມ ໄດ້ນຳພາກຳລັງລົງປະຕິບັດວຽກງານຊ່ວຍຕ້ານການລະບາດພະຍາດໂຄວິດເປັນຈຳນວນຫຼາຍຄັ້ງ ສະພາບຕາມຊາຍແດນ ມີຄວາມສະຫງົບດີ ແຕ່ກໍ່ຍັງມີຄົນຈຳນວນໜື່ງລັກລອບຂ້າມໄປມາແບບຊະຊາຍບໍ່ຖືກຕ້ອງຕາມລະບຽບກົດໝາຍ ນອກນີ້ໄດ້ເຮັດໜ້າທີ່ເອົາໃຈໃສ່ຮັບປະກັນພະລະທິການ-ເຕັກນິກ ແຜນງານແກ້ໄຂຊີວິດການເປັນຢູ່ທາງດ້ານສະບຽງອາຫານພາຍໃນກົມກອງ ຕາມທິດ 4 ປູກ 4 ລ້ຽງຂອງກົມໃຫຍ່ພະລາທິການວາງອອກ ໃນນັ້ນໄດ້ປູກເຂົ້າທັງນາປີ ນາແຊງ ປູກພືດລົ້ມລຸກ ສັງລວມລາຍຮັບໄດ້ 37 ລ້ານກວ່າກີບ ໄດ້ລ້ຽງສັດໃຫຍ່ ລ້ຽງປາ ລ້ຽງສັດປີກເພື່ອຕອບສະໜອງເຂົ້າເຮືອນຄົວລວມ ສ້າງລາຍຮັບໄດ້ເກືອບ 23 ລ້ານກີບ ລວມລາຍຮັບທັງໝົດ 100ລ້ານກວ່າກີບ.
ກອງປະຊຸມຄັ້ງນີ້ໂດຍການ ເປັນປະທານຂອງ ທ່ານ ພັນໂທ ວຽງວິໄລ ແກ້ວບຸນມີ ຫົວໜ້າການທະຫານ ກອງບັນຊາການທະຫານ ເມືອງຫາຊາຍຟອງ ເຂົ້າຮ່ວມມີ ທ່ານ ບຸນເພັງ ສີນະວົງພອນ ເຈົ້າເມືອງຫາດຊາຍຟອງ.
ໃນພິທີທ່ານ ພັນໂທ ຫຼອນຫຼ້າ ບາສີວົງ ຫົວໜ້າພະແນກການເມືອງ ກອງບັນຊາການທະຫານເມືອງຫາດຊາຍຟອງ ໄດ້ລາຍງານບົດສະຫຼຸບ ແລະ ຕີລາຄາຄືນການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານ ແລະ ການຈັດຕັ້ງປະຕິບັດ 7 ລະບອບ 18 ວຽກ ຂອງກອງບັນຊາການທະຫານເມືອງຫາດຊາຍຟອງ ເຊິ່ງໄດ້ຍົກໃຫ້ເຫັນສະພາບຄວາມຫຍຸ້ງຍາກສັບສົນ ແລະ ສີ່ງທ້າທາຍທົດສອບນາໆປະການຂອງໂລກທີ່ກຳລັງກະທົບ ຕໍ່ທາງດ້ານການທະຫານ ເສດຖະກິດ ແລະ ວັດທະນະທຳ ແຕ່ເຖີງຢາງໃດກໍ່ຕາມເມືອງຫາດຊາຍຟອງ ກໍ່ຖືວ່າສະພາບການທາງດ້ານເມືອງຍັງຮັກສາໄດ້ດີ ມີຄວາມສະຫງົບ ເປັນລະບຽບຮຽບຮ້ອຍໃນສັງຄົມ ແຕ່ກໍ່ປາສະຈາກບໍ່ໄດ້ ຕໍ່ບັນຫາການປຸ້ນຈີ້ຊີງຊັບ ສີ່ງເສບຕິດ ອຸບັດເຫດ ອັກຄີໄພ ເຊີ່ງ ເກີດຂື້ນລວມມີ 271 ເລື່ອງ ຜົນເສຍຫາຍ 1 ຕື້ກວ່າກີບ ນອກນີ້ໄດ້ເຮັດໜ້າທີ່ຮັກສາຄວາມສະຫງົບ ຢູ່ຮາກຖານການເມືອງ ໄດ້ແຮກສ່ຽວກັບອົງການປົກຄອງ 3 ບ້ານ ຄື ທ່າເດື່ອ ດົງໂພນແຮ່ ແລະ ຄຳຈະເລີນ ສ່ວນການກຽມພ້ອມສູ້ຮົບ ກອບກູ້ໄພພິບັດ ແລະ ນຳໃຊ້ກຳລັງໄດ້ກຽມພ້ອມຕະຫຼອດ 24 ຊົ່ວໂມງ ນອກນັ້ນຄະນະພັກຄະນະບັນຊາຍັງໄດ້ຖືສຳຄັນຕໍ່ວຽກງານສຶກສາອົບຮົມ-ນຳພາການເມືອງແນວຄິດໃຫ້ກຳລັງພົນ ແລະ ນາຍທະຫານກຳແໜ້ນຕໍ່ແນວທາງນະໂຍບາຍ ເອົາໃຈໃສ່ໃກ້ສິດກຳລັງກອງຫຼອນບ້ານເພື່ອຮັກສາຄວາມສະຫງົບ ຕອນທ້າຍກອງຊຸມເຈົ້າເມືອງຫາດຊາຍຟອງໄດ້ຊີ້ນຳໃຫ້ຍົກສູງບົດບາດສຶກສາອົບຮົມການເມືອງ ແນວທາງຂອງພັກໃຫ້ກຳລັງພົນແລະເພີ່ມທະວີການຮັກສາຄວາມສະຫງົບ ແລະ ຝຶກຝົນຫຼໍ່ຫຼອມຍົກລະດັບຕົນເອງໃຫ້ມີຄຸນະພາບທີ່ດີຂື້ນກວ່າເກົ່າ.