ນາຍົກລັດຖະມົນຕີ ພົບປະໂອ້ລົມ ການນໍາຫລັກແຫລ່ງ ແຂວງອັດຕະປື
ຕອນເຊົ້າວັນທີ 28 ພຶດສະພາ 2022 ນີ້, ທ່ານພັນຄໍາ ວິພາວັນວັນ ກຳມະການກົມການເມືອງສູນກາງພັກ, ນາ ຍົກລັດຖະມົນຕີ ໄດ້ໃຫ້ກຽດພົບປະໂອ້ລົມຕໍ່ການນໍາຫລັກແຫລ່ງ ແຂວງອັດຕະປື ໂດຍມີທ່ານ ເລັດ ໄຊຍະພອນ ກໍາ ມະການສູນກາງພັກ, ເຈົ້າແຂວງ ອັດຕະປື ພ້ອມດ້ວຍຄະ ນະນໍາ ແລະ ພາກສ່ວນກ່ຽວຂ້ອງໃຫ້ການຕ້ອນຮັບ ແລະ ເຂົ້າຮ່ວມຮັບຟັງຢູ່ທີ່ຫໍປະຊຸມໃຫຍ່ຂອງແຂວງ.
ທ່ານ ນາຍົກລັດຖະມົນຕີ ໄດ້ຮັບຟັງການລາຍງານໂດຍຫຍໍ້ ການພັດທະນາເສດຖະກິດ- ສັງຄົມຂອງແຂວງ ໄລຍະ 5 ເດືອນຕົ້ນປີ 2022 ໂດຍສະ ເພາະວຽກງານການຈັດຕັ້ງປະຕິບັດ 2 ວາລະແຫ່ງຊາດ, ແຜນຈັດເກັບລາຍຮັບເຂົ້າງົບປະມານໃນ 5 ເດືອນຜ່ານມາ, ທຽບໃສ່ແຜນການປີ ປະຕິບັດໄດ້ 60%, ການຜະລິດສະ ບຽງອາຫານ ແລະ ຜະລິດເປັນສິນຄ້າ, ບັນດາສິນຄ້າທີ່ສົ່ງ ອອກຕ່າງປະເທດ, ການຜະລິດສິນຄ້າກະສິກໍາສົ່ງເສີມຕາມກົນໄກ 2-3 ແລະ ການລົງທຶນຂອງບັນດາບໍລິສັດພາຍ ໃນແຂວງ, ພ້ອມທັງລາຍງານແຜນສູ້ຊົນສ້າງເສດຖະກິດ- ສັງຄົມຂອງແຂວງ ໃຫ້ຂະຫຍາຍຕົວບໍ່ຫລຸດ 7%ຕໍ່ປີ, ສູ້ຊົນຈັດເກັບລາຍຮັບເຂົ້າງົບປະມານໃນປີ 2022 ໃຫ້ໄດ້ 180 ຕື້ກວ່າກີບ.
ໃນໂອກາດດຽວກັນ ທ່ານ ນາຍົກລັດຖະມົນຕີ ໄດ້ໃຫ້ກຽດໂອ້ລົມຕໍ່ຄະນະພັກ, ຄະນະນໍາ ແລະ ພາກສ່ວນກ່ຽວຂ້ອງຂອງແຂວງ ໂດຍໄດ້ຍົກໃຫ້ເຫັນສະພາບການພັດ ທະນາເສດຖະກິດ-ສັງຄົມທີ່ສໍາຄັນຂອງຊາດ, ສະພາບ ການວິກິດທາງດ້ານເສດຖະກິດການເງິນ, ບັນຫາການ ດຳເນີນ 2 ວາລະແຫ່ງຊາດ ກໍຄືການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ. ພ້ອມນີ້ ໄດ້ຍົກໃຫ້ເຫັນບັນດາຄາດຫມາຍສູ້ຊົນ ຂອງລັດຖະບານຊຸດທີ IX, X, XI ທີ່ໄດ້ຮັບການແກ້ໄຂໄລຍະຜ່ານມາ ແລະ ສະພາບການອື່ນໆ ທີ່ບໍ່ປົກກະຕິເປັນຕົ້ນ: ເງິນເຟີ້, ນໍ້າມັນແພງ, ຄ່າຄ່ອງຊີບສູງ ແລະ ບັນຫາການລະບາດຂອງພະຍາດຕ່າງໆ ໃຫ້ພວກເຮົາຕ້ອງມີສະຕິສູງ, ພ້ອມກັນເອົາໃຈໃສ່ສູ້ຊົນແກ້ໄຂ ແລະ ອັດຊ່ອງທາງຮົ່ວໄຫລໃຫ້ດີທີ່ສຸດ. ອັນສໍາຄັນ ທ່ານ ນາຍົກລັດຖະມົນຕີ ໄດ້ຊີ້ນໍາແກ່ການນໍາຂອງແຂວງ ໃຫ້ສືບຕໍ່ເອົາໃຈໃສ່ພົວພັນຮ່ວມມືກັບບັນດາຕ່າງປະເທດ ເພື່ອຍາດແຍ່ງການຊ່ວຍ ເຫລືອດ້ານທຶນຮອນ ແລະ ວັດຖຸເຕັກນິກ ເພື່ອມາພັດທະ ນາແຂວງອັດຕະປື, ຕ່າງຝ່າຍຕ່າງມີຜົນປະໂຫຍດ, ມີຄຸນ ນະພາບ ແລະ ປະສິດທິຜົນ ຕະຫລອດຮອດພໍ່ແມ່ປະຊາ ຊົນ, ເອົາໃຈໃສ່ສ້າງຄວາມເຂັ້ມແຂງທາງດ້ານການເງິນ, ແກ້ ໄຂບັນຫາຢາເສບຕິດໃຫ້ຫລຸດນ້ອຍຖອຍລົງ, ສືບຕໍ່ຮັກສາມູນເຊື້ອອັນດີງາມຂອງຊາດ,ຂອງເຜົ່າ, ມູນເຊື້ອອາດຫານ, ມີຄວາມສາມັກຄີຊ່ວຍເຫລືອເຊິ່ງກັນ ແລະ ກັນ ໃຫ້ກວ້າງ ຂວາງ ເພື່ອສ້າງເງື່ອນໄຂເອື້ອອໍານວຍໃນການປົກປັກຮັກສາ ແລະສ້າງສາພັດທະນາປະເທດຊາດ.
ທິບພະຈັນ: ຮຽບຮຽງ