ພິທີສະເຫລີມສະຫລອງ ວັນຄວາມປອດໄພ ແລະ ສຸຂະພາບແຮງງານໂລກ ຄົບຮອບ 19 ປີ, ພາຍໃຕ້ຫົວຂໍ້ “ສົ່ງເສີມການຮ່ວມມືຫລາຍຝ່າຍເພື່ອສ້າງວັດທະນະທຳຄວາມປອດໄພ ແລະ ສຸຂະພາບແຮງງານ” ໃນວັນທີ 25 ພຶດສະພາ 2022 ໂດຍມີ ທ່ານ ພົງໄຊສັກ ອິນຖາລາດ ຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ (ຮສສ), ທ່ານ ວິໄລ ວົງຂະເສີມ ຮອງປະທານສູນກາງ ສະຫະພັນກຳມະບານລາວ, ທ່ານ ວັນທອງ ສິດທິກຸນ ຮອງປະທານສະພາການຄ້າ ແລະ ອຸດສາຫະກຳແຮງຊາດລາວ, ທ່ານ ນາງ ຈິໂຮໂກະ ອາຊາດະ ມີຢາກາວະ(Chihoko ASADA-MIYAKAWA) ອຳນວຍການຫ້ອງການແຮງງານສາກົນປະຈຳພາກພື້ນ ອາຊີ-ປາຊີຟິກ, ມີບັນດາແຂກທີ່ຖືກເຊີນເຂົ້າຮ່ວມ ແລະ ຜູ້ເຂົ້າຮ່ວມຜ່ານລະບົບທາງໄກ.
ທ່ານ ພົງໄຊສັກ ອິນຖາລາດ ໄດ້ກ່າວວ່າ: ການຈັດງານສະເຫລີມສະຫລອງ ວັນຄວາມປອດໄພ ແລະ ສຸຂະພາບແຮງງານໂລກ ຄົບຮອບ 19 ປີເພື່ອລະນຶກເຖິງຜູ້ປະສົບເຄາະຮ້າຍຈາກອຸບັດເຫດແຮງງານ ແລະ ພະຍາດຈາກອາຊີບທີ່ເຮັດ, ເປັນການປູກຈິດສຳນຶກໃຫ້ທຸກພາກສ່ວນໃນເຂດເສດຖະກິດ-ສັງຄົມ ໃຫ້ເອົາໃຈໃສ່ການປົກປ້ອງແຮງງານຈາກອຸບັດເຫດ ແລະ ພະຍາດຈາກອາຊີບ ເພື່ອຫລຸດຜ່ອນການໄດ້ຮັບບາດເຈັບແລະ ການເສຍຊີວິດຈາກການເຮັດວຽກ. ສຳລັບ ສປປ ລາວ ໄດ້ໃຫ້ຄວາມສຳຄັນຕໍ່ບັນຫາແຮງງານ ແລະ ສະຫວັດດີການສັງຄົມ ໂດຍກຳນົດແນວທາງ, ນະໂຍບາຍ, ຍຸດທະສາດ, ແຜນການ ຢ່າງຊັດເຈນໃນແຕ່ລະໄລຍະ ເພື່ອເປັນບ່ອນອີງໃນການຈັດຕັ້ງປະຕິບັດ. ພວກເຮົາເຄົາລົບຫລັກການ ການຮ່ວມມື ໃນລະບົບໄຕພາຄີ(ການຮ່ວມມືສາມຝ່າຍ) ຖືສຳຄັນການເຂົ້າຮ່ວມຂອງອົງການຜູ້ຕາງໜ້າຜູ້ອອກແຮງງານ ແລະ ຜູ້ໃຊ້ແຮງງານ ໃນການສ້າງ ແລະ ປັບປຸງນິຕິກຳ, ນະໂຍບາຍຍຸດທະສາດ ແລະ ແຜນປະຕິບັດງານກ່ຽວກັບແຮງງານ ແລະ ສະຫວັດດີການສັງຄົມ ໂດຍໄດ້ຮັບການສະໜັບສະໜູນ ແລະ ການຮ່ວມມືຢ່າງໃກ້ຊິດ ຈາກອົງການແຮງງານສາກົນ, ບັນດາປະເທດເພື່ອນມິດ ແລະ ຄູ່ຮ່ວມພັດທະນາ.
ທ່ານ ພົງໄຊສັກ ອິນຖາລາດ ຍັງໃຫ້ຮູ້ອີກວ່າ: ສປປ ລາວ ໄດ້ໃຫ້ສັດຕະຍາບັນສົນທິສັນຍາຂອງ ອົງການແຮງງານສາກົນແລ້ວ 10 ສະບັບ, ໃນນັ້ນ 5 ສົນທິສັນຍາທີ່ເປັນສິດພື້ນຖານ, ໃນປີ 2022 ພວກເຮົາຈະສະເໜີໃຫ້ສັດຕະຍາບັນຕື່ມ 2 ສັນຍາ ເລກທີ 155 ວ່າດ້ວຍຄວາມປອດໄພ ແລະ ສຸຂະພາບແຮງງານ ແລະ C 187 ຂອບແຜນງານສົ່ງເສີມຄວາມປອດໄພ ແລະ ສຸຂະພາບແຮງງານ. ນອກຈາກນີ້, ກໍສຳເລັດການສັງຮວມຂໍ້ມູນແຫ່ງຊາດ ດ້ານຄວາມປອດໄພ ແລະ ສຸຂະພາບແຮງງານ National OSH Profile ສະບັບທີ 2, ແຜນງານແຫ່ງຊາດ 5 ປີ ຄັ້ງທີ III (2021-2025) ກ່ຽວກັບຄວາມປອດໄພ ແລະ ສຸຂະພາບແຮງງານ ຄາດວ່າປີ 2023 ຈະສະເໜີຕໍ່ສະພາແຫ່ງຊາດເພື່ອຮັບຮອງ.
ທິບພະຈັນ: ຮຽບຮຽງ