ຂ່າວນີ້ຈະພາໄປຮູ້ຈັກໂຄງການຫລຸດຜ່ອນຄວາມທຸກຍາກ ຫຼື ໂຄງການສົ່ງເສີມການພັດທະນາກະສິກຳ ເຂດພູດອຍ, ພາຍຫຼັງ ປະຕິບັດໜ້າທີີ່ຊ່ວຍສົ່ງເສີມປະຊາຊົນພາຍໃນ 3 ເມືອງ ຂອງແຂວງອຸດົມໄຊ ສີ້ນສຸດລົງ ກໍໄດ້ມອບພາຫະນະ ແລະ ອຸປະກອນຮັບໃຊ້ຫ້ອງການຕໍ່ໃຫ້ພະແນກກະສິກຳ ແລະ ປ່າໄມ້ແຂວງ
ໂຄງການຫລຸດຜ່ອນຄວາມທຸກຍາກ ຂອງປະຊາຊົນ ຢູ່ເຂດພູດອຍ ເປັນໂຄງການໜຶ່ງ ທີ່ບໍ່ສັງກັດລັດຖະບານ ຫຼື NGO ໄດ້ເລີ່ມເຄື່ອນໄຫວຈັດຕັ້ງປະຕິບັດ ໄລຍະທີ 1 ຢູ່ໃນ 3 ເມືອງ ຂອງແຂວງອຸດົມໄຊ ຄື ເມືອງງາ, ເມືອງຫລາ ແລະ ເມືອງນາຫມໍ້ ນັບແຕ່ປີ 2013-2017, ຈາກນັ້ນ ໂຄງການໄດ້ຮັບທຶນສະຫນັບສະຫນູນໃຫ້ສືບຕໍ່ເຄື່ອນໄຫວ ຕື່ມອີກ ໄລຍະທີ 2 ໃນປີ 2019-2021 ແລະ ໄດ້ປ່ຽນຊື່ ໂຄງການມາເປັນ ໂຄງການສົ່ງເສີມການພັດທະນາ ທາງດ້ານກະ ສິກຳ ເຂດພູດອຍ ຢູ່ທີ່ເມືອງຫລາ ແລະ ເມືອງນາຫມໍ້ ພາຍໃຕ້ການຄຸ້ມຄອງຂອງພະແນກ ກະສິກຳ ແລະ ປ່າໄມ້ແຂວງ ເຊິ່ງກິດຈະກຳຫລັກ ແມ່ນການລົງຕິດຕາມ, ຊຸກຍູ້, ສົ່ງເສີມ ແລະ ພັດທະນາ ວຽກງານກຳສິກຳການປູກ-ການລ້ຽງ ລວມທັງ ການອົບຮົມ ແລະ ພັດທະນາຄວາມຮູ້, ຄວາມສາມາດໃຫ້ປະຊາຊົນ ຢູ່ເຂດພູດອຍ ແນ່ໃສ່ເຮັດໃຫ້ປະຊາຊົນ ມີອາ ຊີບ, ມີວຽກເຮັດງານທຳ ແລະ ສາມາດສ້າງລາຍຮັບຈາກການຜະລິດກະສິກຳ. ປັດຈຸບັນ ໂຄງການດັ່ງກ່າວໄດ້ສິ້ນສຸດລົງ ດັ່ງນັ້ນ ໂຄງການ ຈຶ່ງໄດ້ນຳເອົາພາຫະນະ ແລະ ອຸປະກອນຮັບໃຊ້ພາຍໃນຫ້ອງການ ມອບຕໍ່ໃຫ້ພະແນກກະສິກຳ ແລະ ປ່າໄມ້ແຂວງ ເພື່ອນຳໃຊ້ເຂົ້າໃນການເຄື່ອນໄຫວວຽກງານທາງລັດຖະການ, ພ້ອມທັງ ບັນທຶກເຂົ້າເປັນຊັບສິນລວມຂອງລັດຕໍ່ໄປ. ເຊິ່ງພາຫະນະ ແລະ ອຸປະກອນຮັບໃຊ້ຫ້ອງການ ທີ່ມອບ-ຮັບ ໃນຄັ້ງນີ້ ປະກອບມີ: ລົດກະບະ ຍີ່ຫໍ້ ໂຕໂຍຕ້າ 1 ຄັນ, ລັດຈັກ ຍີຫໍ້ ຢາມາຮ້າ 17 ຄັນ, ເຄື່ອງປຣິ່ນເອກະສານ, ຄອມພິວເຕີຕັ້ງໂຕະ ແລະ ຄອມພິວເຕີ ໂນດບຸກ ຈຳນວນໜຶ່ງ. ຕາງຫນ້າມອບໂດຍທ່ານ ນາງ ວຽນນະຄອນ ໄຊທົງເດດ ຜູ້ປະສານງານໂຄງການປະຈຳແຂວງອຸດົມໄຊ ແລະ ຮັບໂດຍທ່ານ ຄຳພອນ ມຸນລະໄມ ຫົວໜ້າພະແນກກະສິກຳ ແລະ ປ່າໄມ້ ແຂວງອຸດົມໄຊ, ມີພາກສ່ວນກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ ທ່ານ ຄໍາພອນ ມຸນລະໄມ ໄດ້ສະແດງຄວາມຂອບໃຈມາຍັງໂຄງການ ທີ່ນຳເອົາພາຫະນະ ແລະ ອຸປະກອນຮັບໃຊ້ພາຍໃນຫ້ອງການມອບໃຫ້ກັບພະແນກໃນຄັ້ງນີ້ ແລະ ຈະນຳໃຊ້ເຂົ້າໃນການເຄື່ອນໄຫວວຽກງານວິ ຊາສະເພາະຂອງຕົນ ກໍຄື ວຽກງານທາງລັດຖະການ ໃຫ້ເກີດປະໂຫຍດສູງສຸດ ແລະ ຈະຄຸ້ມຄອງ, ນຳໃຊ້ໃຫ້ຍາວນານ.
ຮຽບຮຽງ: ສົມສະນິດ