ທົ່ວປະເທດ  ຍັງຈະປະເຊີນກັບສະພາບຝົນຕົກ, ຟ້າຮ້ອງ, ຟ້າເຫຼື້ອມ ແລະ ຕົກໜັກບາງທ້ອງຖິ່ນ

ນັບແຕ່ວັນນີ້ ໄປຈົນເຖິງວັນທີ 24 ເມສາ, ທົ່ວປະເທດ ຍັງຈະຕ້ອງພົບກັບສະພາບຝົນຕົກຟ້າ ຮ້ອງ ຟ້າເຫຼື້ອມ ແລະ ຕົກໜັກ ພ້ອມຈະເກີດມີລົມພາຍຸ ຢູ່ບາງທ້ອງຖີ່ນ.

ກົມອຸຕຸນິິຍົມ ແລະ ອຸທົກກະສາດ ໄດ້ຄາດຄະເນວ່າ: ເລີ່ມແຕ່ວັນທີ 18 ຫາ 24 ເມສາ 2022 ມວນອາກາດເຢັນທີ່ປະເທດຈີນ ຈະແຜ່ລົງມາປົກຄຸມຢູ່ເຂດພາກເຫນືອ ແລະ ພາກກາງ ຂອງລາວ, ສົມ ທົບກັບກະແສລົມຕາເວັນອອກ-ຕາເວັນອອກສ່ຽງໃຕ້ ພັດປົກຄຸມເປັນສ່ວນໃຫຍ່, ຈະເຮັດໃຫ້ມີຝົນຕົກຟ້າຮ້ອງ-ຟ້າເຫຼື້ອມ ໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມຈະເກີດມີລົມພາຍຸທ້ອງຖິ່ນ, ຟ້າຜ່າ ແລະ ໝາກເຫັບຕົກ ເປັນບາງໂອກາດຢູ່ບາງທ້ອງຖິ່ນແຂວງພາກເຫນືອ ແລະ ພາກກາງ, ສະເພາະ ພາກເໜືອດ້ານຕາເວັນອອກອາກາດເຢັນ-ໜາວໃນຕອນກາງຄືນ ຫາ ຕອນເຊົ້າ ແລະ ຈະມີຝົນຕົກຟ້າ ຮ້ອງ-ຟ້າເຫຼື້ອມ ພ້ອມມີລົມພັດແຮງເປັນບາງໂອກາດ ອຸນຫະພູມສະເລ່ຍ 17-28 ອົງສາ.

ພາກເໜືອດ້ານຕາເວັນຕົກ ກໍຈະມີຝົນຕົກຟ້າຮ້ອງ-ຟ້າເຫຼື້ອມ ໃນລະດັບຄ່ອຍ ຫາ ປານກາງ ແລະ ຕົກໜັກ ພ້ອມມີລົມພັດແຮງຢູ່ບາງທ້ອງຖິ່ນ, ອາກາດຈະຮ້ອນ ອຸນຫະພູມສະເລ່ຍ 21-36 ອົງສາ. ພາກກາງ ຈະມີອາກາດຮ້ອນໃນຕອນບ່າຍ, ແລະ ຈະມີຝົນຕົກຟ້າຮ້ອງ-ຟ້າເຫຼື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງທ້ອງຖີ່ນ ອູນຫະພູມສະເລ່ຍ 22-36 ອົງສາ ແລະ ແຂວງໄຊສົມບູນ ອາ ກາດຫນາວເຢັນ ແລະ ຈະມີຝົນຕົກຟ້າຮ້ອງ-ຟ້າເຫຼື້ອມໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ອຸນຫະພູມຕ່ຳສຸດ 13-15 ອົງສາ ແລະ ສູງສຸດ 25-27 ອົງສາ. ພາກໃຕ້ ອາກາດຮ້ອນ ພ້ອມມີໝອກແຫ້ງປົກຫຸ້ມໃນຕອນກາງເວັນ ແລະ ຈະມີຝົນຕົກຟ້າຮ້ອງ-ຟ້າເຫຼື້ອມ ໃນລະດັບຄ່ອຍ ພ້ອມມີລົມພັດແຮງຢູ່ບາງທ້ອງຖິ່ນ ອຸນຫະພູມສະເລ່ຍ 22-36 ອົງສາ, ສໍາລັບ ເຂດພູພຽງບໍລະເວນ ອາກາດຈະຫນາວເຢັນ ໃນຕອນເຊົ້າ ແລະ ຈະມີຝົນຕົກ ໃນລະດັບຄ່ອຍ ຫາ ປານກາງ ພ້ອມມີລົມພັດແຮງຢູ່ບາງບໍລິເວນ ອຸນຫະພູມສະເລ່ຍ 12-26 ອົງສາ,  ສ່ວນຢູ່ນະຄອນຫຼວງວຽງຈັນ ແມ່ນຈະເຟື້ອປົກຄຸມ ເປັນສ່ວນຫຼາຍ, ພ້ອມມີຫມອກແຫ້ງປົກຫຸ້ມ ໃນຕອນກາງເວັນ ແລະ ຝົນຕົກໃນລະດັບຄ່ອຍ ຫາ ປານກາງ, ພ້ອມມີລົມພັດແຮງຢູ່ບາງບໍລິເວນ.