ເຈົ້າໜ້າທີ່ ທີ່ກ່ຽວຂ້ອງຂອງ ແຂວງບໍ່ແກ້ວ ໄດ້ລົງກວດສານປົນເປື້ອນໃນໄລຍະບູນປີໃໝ່ລາວ ຢູ່ຕະ ຫຼາດ ແລະ ຮ້ານຄ້າຕ່າງໆ ຈຳນວນ 17 ຫົວໜ່ວຍ ພົບສານປົນເປື້ອນ 11,5 ກິໂລ ໃນຍໍຂາວ
ໃນວັນທີ 11 ເມສາ 2022 ເຈົ້າໜ້າທີ່ກວດກາການຄ້າສົມທົບ ພະແນກສາທາລະນະສຸກແຂວງ ລົງກວດກາສິນຄ້າປົນເປື່ອນ, ສິນຄ້າເຊື່ອມຄຸນ ຕົ້ນຕໍແມ່ນ ກະຕ໋າຂອງຂວັນ, ອາຫານທະເລ ແລະ ອາ ຫານແຊ່ແຂງ ຢູ່ຕະຫຼາດ, ຮ້ານຄ້າຕ່າງໆໄດ້ທັງໝົດ 17 ຫົວໜ່ວຍ, ໃນນີ້ ສາມາດກວດພົບເຫັນ 3 ຫົວໜ່ວຍ ມີການຈໍາໜ່າຍສິນຄ້າອາຫານແຊ່ແຂງ ປະເພດຍໍຂາວ 11,5 ກິໂລ, ລວມມູນຄ່າ 805.000 ກີບ ທີ່ມີສານປົນເປື້ອນ (ຟໍມາລິນ) ສະນັ້ນ, ເຈົ້າຫນ້າທີ່ກວດກາຈຶ່ງສ້າງບົດບັນທຶກກ່າວເຕືອນພ້ອມທັງຢືດສິນຄ້າດັ່ງກ່າວເພື່ອທຳລາຍຖີ້ມຕາມລະບຽບການ.
ຕໍ່ກັບສິນຄ້າເຊື່ອມຄຸນ, ສິນຄ້າໝົດອາຍຸ ແລະ ສິນຄ້າທີ່ມີສານປົນເປື່ອນ ທີ່ເປັນອັນຕະລາຍຕໍ່ສຸ ຂະພາບ ແລະ ຊັບສິນຂອງສັງຄົມ, ຜູ້ປະກອບການ, ຫົວໜ່ວຍທຸລະກິດ, ພໍ່ຄ້າຊາວຂາຍ ຄວນເອົາໃຈໃສ່ເປັນເຈົ້າການນໍາເອົາສິນຄ້າທີ່ມີຄຸນນະພາບມາຈໍາໜ່າຍ ໃນໄລຍະເທດສະການບຸນປີໃໝ່ລາວ 2022 ເພື່ອຮັບປະກັນທາງດ້ານການສະໜອງສິນຄ້າ, ທັງປະລິມານ ແລະ ຄຸນນະພາບໃຫ້ພຽງພໍກັບຄວາມຕ້ອງການ ແລະ ເຮັດໃຫ້ຜູ້ຊົມໃຊ້ໄດ້ຮັບຄວາມເປັນທຳ.
ພາບ-ຂ່າວ: ຂະແໜງການຄ້າພາຍໃນ