ໂດຍປະຕິບັດຕາມແຈ້ງການຂອງກອງບັນຊາການ ປກສ ນວ ເລກທີ 123/ປກສ.ນວ ລົງວັນທີ 11 ເມສາ 2022 ເລື່ອງການເພີ່ມທະວີປ້ອງກັນຄວາມສະຫງົບ, ຄວາມເປັນລະບຽບຮຽບຮ້ອຍ ໃນໄລຍະສະເຫລີມສະຫລອງປີໃຫມ່ລາວ ພສ 2565 ດັ່ງນັ້ນ ວັນທີ 12 ເມສາ 2022, ປກສ ກຸ່ມວັງຊາຍ ເມືອງໄຊເສດຖາ ນະຄອນຫລວງວຽງຈັນ ໄດ້ຈັດພິທີຜ່ານແຜນປ້ອງກັນໄລຍະປີໃຫມ່ລາວ ພສ 2565 ໃນລະຫວ່າງວັນທີ14-16 ເມສາ 2022, ຂຶ້ນຢູ່ຫ້ອງການ ປກສ ກຸ່ມ ໂດຍການເປັນປະທານຂອງ ພັທ ຊື່ວ່າງ ກ່າລໍ່ ຫົວຫນ້າ ປກສ ກຸ່ມວັງຊາຍ ມີກໍາລັງປກສ ກຸ່ມ, ຕາງຫນ້າອໍານາດການປົກຄອງບ້ານ 10 ບ້ານເຂົ້າຮ່ວມ.
ພັທ ຊື່ວ່າງ ກ່າລໍ່ ຫົວຫນ້າ ປກສ ກຸ່ມ ວັງຊາຍ ໃຫ້ຮູ້ວ່າ: ເພື່ອເຮັດໃຫ້ພາຍໃນກຸ່ມມີຄວາມສະຫງົບ ເປັນລະບຽບຮຽບຮ້ອຍ ແລະ ບໍ່ໃຫ້ມີປະກົດການຫຍໍ້ທໍ້ເກີດຂຶ້ນ ໃນໄລຍະສະເຫລີມສະຫລອງບຸນປີໃຫມ່ລາວ ພສ 2565 ປກສ ກຸ່ມວັງຊາຍ ໄດ້ຈັດວາງກໍາລັງ ປະຈໍາການຕະຫລອດ 24 ຊົ່ວໂມງ ແຕ່ວັນທີ 14-16 ເມສາ 2022 ໂດຍຈັດວາງກໍາລັງລົງປະຈໍາທັງຫມົດ 11 ຈຸດ ໃນນີ້, ຈຸດທີ່ 1 ແມ່ນຢູ່ຫ້ອງການ ປກສກຸ່ມ ສ່ວນອີກ 10 ຈຸດແມ່ນ ປະຈໍາການ ຢູ່ 10 ບ້ານທີ່ຂຶ້ນກັບ ປກສ ກຸ່ມ.
ຂ່າວ: ທິບພະຈັນ