ກອງປະຊຸມຈັດຂື້ນໃນວັນທີ 6 ເມສາ 2022 ຜ່ານມາ,ພາຍໃຕ້ການເປັນປະທານ ໂດຍ ພັອ ສຸກພະຈັນ ບຸດດາຄໍາ ຫົວໜ້າກອງບັນຊາການປ້ອງກັນຄວາມສະຫງົບ ນະຄອນຫຼວງວຽງຈັນ ຮອງຫົວໜ້າສະເພາະກິດ ນະຄອນຫຼວງວຽງຈັນ. ມີບັນດາຄະນະພັກ-ຄະນະນຳ ຈາກອະນຸກໍາມະການ ປກຊ-ປກສ, ກອງເຂົ້າຮ່ວມ.
ພັທ ບຸນລັບ ໄຊຍະວົງ ຮອງຫົວໜ້າຫ້ອງການ ປກສ ນະຄອນຫຼວງວຽງຈັນ ໄດ້ກ່າວວ່າ ກອງປະຊຸມໃນຄັ້ງນີ້ ແມ່ນເພື່ອຈັດຕັ້ງປະຕິບັດບັນດາມາດຕະການທາງດ້ານກົດໝາຍ ແລະ ວິຊາສະເພາະ ເຂົ້າໃນການສະກັດກັ້ນ, ຄວບຄຸມ ແລະ ການແກ້ໄຂການແຜ່ລະບາດຂອງພະຍາດໂຄວິດ-19. ໂດຍເນັ້ນໜັກວຽກງານຈຸດສຸມ 11 ວຽກ: 1. ວຽກງານໂຄສະນາປະຊາສໍາພັນ, 2. ວຽກງານສະກັດກັ້ນຕາມຊາຍແດນ, 3. ວຽກງານຄຸ້ມຄອງກວດກາປະຕູເຂົ້າ-ອອກ ຢູ່ຕາມດ່ານສາກົນ, ດ່ານປະເພນີ ທັງທາງບົກ, ທາງນໍ້າ ແລະ ທາງອາກາດ. 4. ວຽກງານຈັດຕັ້ງກໍາລັງປ້ອງກັນຄວາມສະຫງົບ ຢູ່ຕາມຈຸດ ໂຮງໝໍ, ສູນກັກກັນ, ຈຸດກວດກັ່ນຕອງຫາເຊື້ອ ແລະ ສະຖານທີ່ກັກກັນຢູ່ຕາມໂຮງແຮມ. 5. ວຽກງານສືບຄົ້ນຫາ ແລະ ວຽກງານສືບສວນ-ສອບສວນ, ໄລ່ຊອກໄລ່ຫາເປົ້າໝາຍ. 6. ວຽກງານປ້ອງກັນ, ການແຜ່ເຊື້ອເຂົ້າສູ່ຄ້າຍຄຸມຂັງດັດສ້າງ ແລະ ສູນບໍາບັດ. 7. ວຽກງານປະສານສົມທົບໃນການສະກັດກັ້ນ ແລະ ແກ້ໄຂກໍລະນີລະເມີດຄໍາສັ່ງແຈ້ງການ. 8. ວຽກງານແກ້ໄຂປະກົດການຫຍໍ້ທໍ້ໃນສັງຄົມ
9. ວຽກງານຮັກສາຄວາມປອດໄພ ໃຫ້ແກ່ກອງປະຊຸມ, ຂະບວນຂອງການນໍາລົງຕິດຕາມຊຸກຍູ້. 10. ວຽກງານຄຸ້ມຄອງແຮງງານຢູ່ພາຍໃນ ແລະ ມາຈາກຕ່າງປະເທດ ແລະ 11. ວຽກງານກະກຽມ, ພາຫະນະ, ອຸປະກອນປ້ອງກັນ, ຄຸ້ມຄອງຄວາມປອດໄພໃຫ້ແກ່ກໍາລັງ.
ທິບພະຈັນ ຮຽບຮຽງ