ວັນທີ 29 ມີນາ 2022, ອະນຸກຳມະການໂຄສະນາວາລະจากແຫ່ງຊາດ ປກສ ເມືອງຈັນທະບູລີ ສົມທົບກັບຫ້ອງການສຶກສາເມືອງ, ປກສ ກຸ່ມທົ່ງຕູມ ແລະ ອົງການປົກຄອງບ້ານຮ່ອງຄ້າ ລົງໂຄສະນາເຜີຍແຜ່ ການຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ຕິດພັນກັບລະບຽບການສັນຈອນ ຕາມທ້ອງຖະໜົນຫຼວງ ໃຫ້ຄູອາຈານ ແລະ ນ້ອງນັກຮຽນໂຮງຮຽນ ມສ ຮ່ອງຄ້າ ເມືອງຈັນທະບູລີ. ໂດຍການເປັນປະທານຂອງ ພັທ ສັງທອງ ພັນວົງສາ ຮອງຫົວໜ້າກອງບັນຊາການ ປກສ ເມືອງຈັນທະບູລີ, ມີທ່ານ ຈັນທະຄານ ລັດຕະນາ ຮອງຫົວໜ້າຫ້ອງການສຶກສາເມືຶອງ, ທ່ານ ບຸນນຽມ ເພັດໄຊ ຜູ້ອຳນວຍການໂຮງຮຽນ ມສ ຮ່ອງຄ້າ, ມີ ປກສ ກຸ່ມ, ອົງການປົກຄອງບ້ານ, ຄູອາຈານ ແລະ ນ້ອງນັກຮຽນ ເຂົ້າຮ່ວມ.
ພັທ ສັງທອງ ພັນວົງສາ ໃຫ້ຮູ້ວ່າ: ການໂຄສະນາເຜີຍແຜ່ຄັ້ງນີ້ ເພື່ອປູກຈິດສໍານຶກໃຫ້ຄູອາຈານ ແລະ ນ້ອງນັກຮຽນ ໂຮງຮຽນ ມສ ຮ່ອງຄ້າ ໄດ້ຮັບຮູ້ ແລະ ເຂົ້າໃຈເຖິງຜົນຮ້າຍ ໄພອັນຕະລາຍຂອງຢາເສບຕິດ ທີ່ມີຜົນກະທົບຕໍ່ຜູ້ເສບ, ຄອບຄົວ, ສັງຄົມ ແລະ ປະເທດຊາດກໍ່ໃຫ້ເກີດມີປະກົດການຫຍໍ້ທໍ້ຕ່າງໆເກີດຂຶ້ນເຊັ່ນ: ບັນຫາການປຸ້ນຈີ້, ຊີງຊັບ, ຂີ້ລັກ, ງັດແງະ ແລະ ອື່ນໆ; ຄຽງຄູ່ກັນນີ້ ໄດ້ໂຄສະນາປູກຈິດສໍານຶກກ່ຽວກັບກົດລະບຽບຈະລາຈອນ ເພື່ອໃຫ້ຄູອາຈານ ແລະ ນ້ອງນັກຮຽນ ຮູ້ເຖິງກົດລະບຽບຈະລາຈອນ ແລະ ການຂັບຂີ່ປອດໄພ ຫຼີກລ່ຽງບັນຫາການເກີດອຸບັດຕິເຫດ ເປັນຕົ້ນແມ່ນ: ກ່ອນຈະອອກເດີນທາງທຸກຄັ້ງຕ້ອງກວດກາສະພາບເຕັກນິກຂອງລົດໃຫ້ລະອຽດ, ໃຫ້ກຽດແກ່ຜູ້ຮ່ວມທາງ, ບໍ່ດື່ມສິ່ງມຶນເມົາແລ້ວຂັບຂີ່ພາຫະນະ, ຮັກສາຄວາມໄວໄລຍະຫ່າງຕາມການກໍານົດ, ບໍ່ລ່ວງໄຟອໍານາດ ແລະ ບໍ່ຊີງແຊງໂດຍບໍ່ຮັບປະກັນ, ເປີດໄຟສັນຍານກ່ອນລ້ຽວຊ້າຍ-ລ້ຽວຂວາເພື່ອຫຼີກລ່ຽງບັນຫາການເກີດອຸບັດຕິເຫດ.
ຂ່າວ:ປກສ ນວ ທິບພະຈັນ ຮຽບຮຽງ