ນັບແຕ່ມີການລະບາດຂອງພະຍາດໂຄວິດ-19 ຢູ່ປະເທດເຮົາ, ໄດ້ສົ່ງຜົນກະທົບບໍ່ໜ້ອຍຕໍ່ການດໍາລົງຊີວິດຂອງປະຊາຊົນລາວ ກໍຄືການດໍາເນີນທຸລະກິດຂອງຫົວໜ່ວຍທຸລະກິດໃນປະເທດເຮົາ ແຕ່ຍັງມີຫຼາຍທຸລະກິດ ທີ່ຍັງສາມາດດໍາເນີນໄດ້ດີ ແລະ ຫັນມາພັດທະນາຕົນເອງໃຫ້ເຂັ້ມແຂງຂຶ້ນ ຫັນວິກິດເປັນໂອກາດ ຄຽງຄູ່ກັບການຊ່ວຍເຫຼືອສັງຄົມ ເຊັ່ນດຽວກັບ ບໍລິສັດ CNP ສຳຫຼວດ ແລະ ຂຸດຄົ້ນບໍ່ແຮ່ ຂາເຂົ້າ-ຂາອອກ ຈຳກັດຜູ້ດຽວ.
ທ່ານ ນາງ ຈັນນະພາ ວົງສະໝໍລະພູມ ປະທານ ບໍລິສັດ CNP ສຳຫຼວດ ແລະ ຂຸດຄົ້ນບໍ່ແຮ່ ຂາເຂົ້າ-ຂາອອກ ຈຳກັດຜູ້ດຽວ ໄດ້ໃຫ້ສໍາພາດຕໍ່ນັກຂ່າວໂທລະພາບນະຄອນຫຼວງວຽງຈັນ ໃນໂອກາດໄດ້ຮັບລາງວັນ ນັກທຸລະກິດຊັ້ນນໍາດີເດັ່ນ ຂອງສະພາການຄ້າ ແລະ ອຸດສາຫະກຳ ແຫ່ງຊາດລາວ ວ່າ: ຮູ້ສຶກມີຄວາມພາກພູມໃຈທີ່ສຸດທີ່ໄດ້ຮັບລາງວັນດັ່ງກ່າວນີ້, ນັບແຕ່ພະຍາດໂຄວິດ-19 ລະບາດຢູ່ປະເທດເຮົາເປັນຕົ້ນມາ, ລັດຖະບານໄດ້ອອກບັນດາມາດຕະການ ເພື່ອຄວບຄຸມການແຜ່ລະບາດ ໃນແຕ່ລະໄລຍະ ຊຶ່ງພວກເຮົາກໍ່ກໍາໄດ້ແນວທາງຂອງລັດຖະບານໃນການປ້ອງກັນພະຍາດໂຄວິດ-19 ເຮັດໃຫ້ບໍ່ມີການລະບາດພາຍໃນບໍລິສັດຂອງພວກເຮົາ ແລະ ທຸລະກິດກໍສາມາດດໍາເນີນໄດ້ ຊຶ່ງໃນໄລຍະວິກິດໂຄວິດ 19ຜ່ານມາການດຳເນີນທຸລະກິດຂອງບໍລິສັດແມ່ນໄດ້ຮັບຄວາມເອົາໃຈໃສ່ຈາກລັດຖະບານ ແລະ ຄະນະສະເພາະກິດທີ່ໄດ້ລົງໄປຢ້ຽມຢາມ, ເຮັດວຽກຢູ່ພາກສະໜາມຮ່ວມກັບບໍລິສັດ ເພື່ອໃຫ້ທຸລະກິດໄດ້ດຳເນີນເປັນປົກກະຕິ, ເພື່ອໃຫ້ປະຊາຊົນໃນເຂດໃກ້ຄຽງ 90% ໄດ້ມີວຽກເຮັດງານທໍາ ໃນນັ້ນ 70% ແມ່ນຄົນໃນທ້ອງຖິ່ນ ພ້ອມນັ້ນ ບໍລິສັດຍັງໄດ້ປະກອບສ່ວນມອບພັນທະໃຫ້ລັດຖະບານ ແລະ ປະກອບສ່ວນຊ່ວຍເຫຼືອສັງຄົມອີກດ້ວຍ.
ຮັບຟັງຂ່າວ:
ນອກນັ້ນ ທ່ານຍັງໃຫ້ຮູ້ຕື່ມວ່າ ບໍລິສັດ ຊີເອັນພີ ສຳຫຼວດ-ຂຸດຄົ້ນບໍ່ແຮ່ ຂາເຂົ້າ-ຂາອອກ ຈຳກັດ ຜູ້ດຽວ ແມ່ນສ້າງຕັ້ງຂຶ້ນໃນປີ 2004 ຈຶ່ງໄດ້ດໍາເນີນການຊອກຂຸດຄົ້ນບໍ່ເຫຼັກ ຢູ່ເມືອງຫຼາ ແຂວງອຸດົມໄຊ ບໍ່ທອງແດງ ແລະ ບໍ່ຊືນສັງກະສີ, ເຊິ່ງເປັນທຸລະກິດໜຶ່ງທີ່ກ້າວມາຈາກການດຳເນີນຂຸດຄົ້ນບໍ່ແຮ່ ແລະ ໄດ້ເຊັນສັນຍາກັບລັດຖະບານ ເພື່ອຊອກຄົ້ນສຳຫຼວດບໍ່ແຮ່ເຫຼັກ, ຊືນ ແລະ ສັງກະສີ, ພ້ອມທັງໄດ້ລົງສ້າງຕັ້ງໂຮງງານຂຸດຄົ້ນແຮ່ໃນປີ 2011 ແລະ ມາໃນປີ 2013-2014 ໄດ້ເລີ່ມຂຸດຄົ້ນແຮ່ເຫຼັກສົ່ງອອກ ຈໍານວນ 5 ແສນໂຕນ, ໂດຍແຮ່ທັງໝົດແມ່ນໄດ້ຜ່ານການປຸງແຕ່ງສຳເລັດເພື່ອສົ່ງອອກໄປ ສາທາລະນະລັດ ປະຊາຊົນຈີນ ມາຮອດປະຈຸບັນ ບໍລິສັດມີສິນຄ້າສະສົມໄວ້ 7 ແສນກວ່າໂຕນ ເພື່ອສ້າງລາຍຮັບໃຫ້ແກ່ລັດຖະບານ ແລະ ຊ່ວຍໃຫ້ປະຊາຊົນມີວຽກເຮັດງານທຳ ທັງນີ້ ຖ້າຜ່ານພົ້ນວິກິດໂຄວິດ-19 ໂດຍບໍລິສັດຈະສາມາດຂົນສົ່ງໄດ້ 3-5 ພັນໂຕນຕໍ່ວັນ
