ເຈົ້າໜ້າທີ່ ປກສ ເມືອງແອດ ໄດ້ຮັບແຫຼ່ງຂໍ້ມູນຈາກພົນລະເມືອງດີວ່າ: ມີກຸ່ມຄົນບໍ່ດີເຄື່ອນໄຫວ ຄ້າຂາຍຢາເສບຕິດຢູ່ໃນຂອບເຂດບ້ານພຽງເງິນ ເມືອງແອດ ແຂວງຫົວພັນ, ສະນັ້ນເຈົ້າໜ້າທີ່ ປກສ ເມືອງແອດ ຈຶ່ງໄດ້ແຕ່ງຕັ້ງໜ່ວຍງານວິຊາສະເພາະ ລົງຕິດຕາມເກັບກໍາຂໍ້ມູນພິສູດແຫຼ່ງຂ່າວຕົວຈິງ ເຫັນວ່າມີມູນຄວາມຈິງແທ້, ມາຮອດເວລາ 8 ໂມງ ຂອງວັນທີ 25 ພຶດສະພາ 2022, ເຈົ້າໜ້າທີ່ ຈິ່ງໄດ້ນໍາກໍາລັງສົມທົບ ໄອຍາການ ເຂດII ປະຈໍາເມືອງແອດ, ປກສ ກຸ່ມ ເມືອງວັ້ນ, ປກສ ບ້ານພຽງເງິນ ແລະ ອໍານາດການປົກຄອງບ້ານ ເຂົ້າກວດຄົ້ນເຄຫາສະຖານ ເຮືອນຂອງເປົ້າໝາຍດັ່ງກ່າວ ຊື່ ທ້າວ ວຽງພອນ ອາຍຸ 60 ປີ ແລະ ນາງ ລາຍ ອາຍຸ 58 ປີ, ຊົນເຜົ່າ ອິວມຽນ ເຊິ່ງເປັນປະຊາຊົນຢູ່ບ້ານ ພຽງເງິນ ເມືອງແອດ ແຂວງຫົວພັນ; ຜ່ານການກວດຄົ້ນຂອງຄະນະສະເພາະກິດ ໄດ້ພົບເຫັນຂອງກາງ ປະເພດຢາບ້າ ຈໍານວນ 13 ຖົງ, ມີ 2800 ເມັດ, ເງິນກີບ 903,000 ກີບ ( ເກົ້າແສນສາມພັນກີບ ), ເງິນດົງ ຫວຽດນາມ 10,600,000 ດົງ ( ສິບລ້ານ ຫົກແສນ ດົງ ) ທີ່ຊຸກເຊື່ອງໄວ້ຢູ່ທີ່ຕຽງນອນຂອງຜູ້ກ່ຽວ ສະນັ້ນເຈົ້າໜ້າທີ່ ປກສ ເມືອງແອດ ຈຶ່ງໄດ້ຍຶດຂອງກາງຈໍານວນດັ່ງກ່າວ ພ້ອມທັງຈັບຕົວຜູ້ກ່ຽວມາດໍາເນີນການສືບສວນ-ສອບສວນ ຫາກຸ່ມແກ້ງຮ່ວມຂະບວນການ ເພື່ອມາດໍາເນີນຄະດີຕາມຂັ້ນຕອນຂອງກົດໝາຍ.
ທິບພະຈັນ:ຮຽບຮຽງ