ໃນວັນທີ 23 ພຶດສະພາ 2022 ທີ່ຜ່ານມານີ້, ໜ່ວຍງານອາຫານ ແລະ ຢາ ສົມທົບກັບ ພາກສ່ວນທີ່ກ່ຽວຂ້ອງ ໄດ້ລົງເຄື່ອນໄຫວກວດກາສິນຄ້າທີ່ນຳເຂົ້າບໍ່ຖືກຕ້ອງ, ສິນຄ້າປອມແປງລອກຮຽນແບບ, ສິນຄ້າໝົດອາຍຸ, ແລະ ສິນຄ້າເຊື່ອມຄຸນນະພາບ ຢູ່ຕາມຕະຫລາດ ແລະຮ້ານຂາຍເຄື່ອງຍ່ອຍ ພາຍໃນເທດສະບານເມືອງ, ເຊິ່ງນຳໂດຍ ທ່ານ ນາງ ແກ້ວວິໄລ ມະນີວົງ ຫົວໜ້າໜ່ວຍອາຫານ ແລະ ຢາເມືອງ, ທ່ານສີນາບອນ ໄຊຍະບຸດ ຫົວໜ້າໜ່ວຍງານການຄ້າພາຍໃນເມືອງກະລຶມ ພ້ອມດ້ວຍພະນັກງານວິຊາການ ແລະ ພາກສ່ວນກ່ຽວຂ້ອງເຂົ້າຮ່ວມ.
ການລົງກວດກາຄັ້ງນີ້ ໄດ້ພົບເຫັນສິນຄ້າທີ່ຕ້ອງຫ້າມ ປະເພດເຄື່ອງສຳອາງ ລູກກິ້ງ ( ໂລອອນ ) ຈຳນວນ 204 ຂວດ, ມູນຄ່າ4.771.000 ກີບ, ພົບເຫັນສິນຄ້າໝົດອາຍຸ ປະເພດ ເຂົ້າໜົມ ແລະ ເຄື່ອງສຳອາງ ມູນຄ່າ 2.255.000 ກີບ, ລວມມູນຄ່າທັງໝົດ6.966.000 ກີບ. ໃນນີ້ ສຳລັບສິນຄ້າທີ່ນຳເຂົ້າບໍ່ຖືກຕ້ອງ ຫຼື ບໍ່ຜ່ານກົມອາຫານ ແລະ ຢາ ( ກອຢ ) ຂອງບໍລິສັດ DKSH ແມ່ນທາງເຈົ້າໜ້າທີ່ໄດ້ອາຍັດໄວ້ ເພື່ອເກັບກຳຂໍ້ມູນ ນຳໄປແຈ້ງໃຫ້ບໍລິສັດດັ່ງກ່າວໄປຂຶ້ນທະບຽນໃຫ້ຖືກຕ້ອງຕາມລະບຽບການ, ສ່ວນສິນຄ້າທີ່ໝົດອາຍຸແມ່ນຈະໄດ້ທຳລາຍຖິ້ມ. ຕໍ່ກັບຮ້ານຂາຍເຄື່ອງຍ່ອຍທີ່ພົບສິນຄ້າຕ້ອງຫ້າມ ແລະ ໝົດອາຍຸ ດັ່ງກ່າວ ເຈົ້າໜ້າທີ່ກໍໄດ້ສຶກສາອົບຮົມ ພ້ອມທັງເຮັດບົດບັນທຶກໄວ້ເປັນຫຼັກຖານ ເພື່ອແນໃສ່ປົກປ້ອງຜູ້ດຳເນີນທຸລະກິດທີ່ຖືກຕ້ອງຕາມລະບຽບກົດຫມາຍ ແລະ ເປັນການປົກປ້ອງຜູ້ຊົມໃຊ້, ຜູ້ບໍລິໂພກໃນສັງຄົມໃຫ້ໄດ້ຊົມໃຊ້ສິນຄ້າທີ່ຖືກຕ້ອງ ແລະ ມີຄຸນນະພາບດີ.
ທິບພະຈັນ: ຮຽບຮຽງ