ເຈົ້າໜ້າທີ່ ປກສ ເມືອງກວັນ ແຂວງຫົວພັນ ໄດ້ຮັບລາຍງານຈາກພົນລະເມືອງດີໃນຕອນເຊົ້າຂອງວັນທີ 18 ພຶດສພາ 2022 ຜ່ານມານີ້ ວ່າ: ມີຄົນບໍ່ດີເຄື່ອນໄຫວຄ້າຂາຍຢາເສບຕິດຢູ່ໃນຂອບເຂດບ້ານລ້ອງກວ້າງ ເມືອງກວັນ ແຂວງຫົວພັນ, ຈາກນັ້ນເຈົ້າໜ້າທີ່ວິຊາສະເພາະ ຈຶ່ງໄດ້ລົງຕິດຕາມເກັບກໍາຂໍ້ມູນ ເຫັນວ່າມີຄວາມຈິ່ງແທ້ ຮອດເວລາ 15 ໂມງ 40 ນາທີ ຂອງວັນດຽວກັນ ຈຶ່ງໄດ້ນໍາກໍາລັງວິສາສະເພາະເຂົ້າໄປກວດຄົ້ນເຄຫາສະຖານຂອງເປົ້າໝາຍ ຊື່ທ້າວ ໄຊເກົ່າມົວ ອາຍຸ 50 ປີ ປະຊາຊົນບ້ານລ້ອງກວ້າງ ເມືອງກວັນ ແຂວງຫົວພັນ ຜ່ານການກວດຄົ້ນໄດ້ພົບເຫັນຢາບ້າ ຈໍານວນ 112 ເມັດ ຊຸກເຊື່ອງຢູ່ຖົງໂສ້ງຂອງຜູ້ກ່ຽວ ພ້ອມອຸປະກອນເສບຢາບ້າ 1 ຊຸດ ແລະ ອຸປະກອນເສບຢາຝິ່ນ 1 ຊຸດ, ດັ່ງນັ້ນ ເຈົ້າໜ້າທີ່ ຈຶ່ງໄດ້ຍຶດຂອງກາງດັ່ງກ່າວ ແລະ ຈັບຕົວຜູ້ກ່ຽວມາດຳເນີນການສືບສວນສອບສວນ ຂະຫຍາຍຜົນຫາກຸ່ມແກ້ງຮ່ວມຂະບວນການ. ຜູ້ກ່ຽວໄດ້ຮັບສາລະພາບວ່າ ຢາເສບຕິດຈໍານວນດັ່ງກ່າວແມ່ນຂອງຜູ້ກ່ຽວແທ້ ເພາະຜູ້ກ່ຽວໄດ້ຕິດຢາເສບຕິດມາໄດ້ປະມານ20ປີ ແລ້ວໃນທ້າຍເດືອນເມສາຜ່ານມານີ້ ໄດ້ມີຄົນບໍ່ຮູ້ຊື່ ບໍ່ຮູ້ທີ່ຢູ່ໄດ້ນໍາເອົາຢາບ້າມາຂາຍໃຫ້ຈໍານວນ 1 ຖົງ ໃນລາຄາ 400.000 ກີບ ຫຼັງຈາກນັ້ນຜູ້ກ່ຽວກໍ່ໄດ້ເສບ ແລະ ຂາຍຍ່ອຍໃຫ້ກັບຜູ້ທີຕິດຢາເສບຕິດພາຍໃນບ້ານດຽວກັນ ໃນລາຄາເມັດລະ 4.000 ກີບ ຈົນມາຮອດວັນທີ18 ພຶດສພາ 2022 ຈຶ່ງຖືກເຈົ້າໜ້າທີ່ ປກສ ເມືອງກວັນ ເຂົ້າໄປກວດຄົ້ນ ແລະ ຈັບຕົວຜູ້ກ່ຽວພ້ອມກອງກາງຢາບ້າຈໍານວນ 112 ເມັດ ແລະອຸປະກອນຢາເສບຕິດມາດໍາເນີນຄະດີ.
ປັດຈຸບັນ ຄະດີດັ່ງກ່າວ ເຈົ້າໜ້າທີ່ ປກສ ເມືອງກວັນ ໄດ້ນໍາສົ່ງຜູ້ກ່ຽວພ້ອມຂອງກາງ ໃຫ້ພະແນກສະກັດກັ້ນ ແລະ ຕ້ານຢາເສບຕິດ ຫ້ອງຕໍາຫຼວດ ປກສ ແຂງຫົວພັນດໍາເນີນຄະດີຕາມລະບຽບກົດໝາຍ.
ຮຽບຮຽງ: ທິບພະຈັນ