ທ່ານ ພົຕ ວັນທອງ ກອງມະນີ ຮອງລັດຖະມົນຕີ ຫົວໜ້າກົມໃຫຍ່ການເມືອງ ກະຊວງປ້ອງກັນຄວາມສະຫງົບ(ປກສ) ໄດ້ຕ້ອນຮັບ ທ່ານພັອ ຫງວຽນ ເລ ກວາງ ຮອງຫົວໜ້າກົມຄຸ້ມຄອງກໍ່ສ້າງ ແລະ ຄ້າຍຄູ ກະຊວງ ປກສ ຫວຽດນາມ ແລະ ທ່ານ ພົຈວ ຟານ ແທັງ ຕວັນຫົວໜ້າອົງການຜູ້ຕາງໜ້າ ກະຊວງ ປກສຫວຽດ ນາມ ປະຈຳລາວ ພ້ອມຄະນະ ທີ່ເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ໂດຍສອງຝ່າຍ ໄດ້ພ້ອມກັນປຶກສາຫາລືກ່ຽວກັບ ວຽກງານການສໍາຫລວດໂຄງການກໍ່ສ້າງ ວິທະຍາຄານການເມືອງປ້ອງກັນຄວາມສະຫງົບ ເພື່ອເຮັດໃຫ້ໂຄງການດັ່ງກ່າວ ໄດ້ຮັບການຈັດຕັ້ງປະຕິບັດ ເພື່ອເປັນສັນຍາລັກພິເສດ ໃນປີສາມັກຄີມິດຕະພາບ ລະຫວ່າງ ກະ ຊວງ ປກສ ລາວແລະ ກະຊວງ ປກສ ຫວຽດນາມ.
ທ່ານຮອງລັດຖະມົນຕີ ກະຊວງ ປກສ ໄດ້ ສະແດງຄວາມຊົມເຊີຍ ແລະ ຕີລາຄາສູງຕໍ່ການຢ້ຽມຢາມໃນຄັ້ງນີ້, ໃນໂອກາດສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ ປີ 2022 ຈະເປັນການສືບຕໍ່ເພີ່ມພູມຄູນສ້າງ ແລະ ເສີມຂະຫຍາຍມູນເຊື້ອແຫ່ງສາຍພົວພັນມິດຕະພາບ ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມໂດຍສະເພາະການພົວພັນຮ່ວມມືລະຫວ່າງ ສອງກະຊວງ ປກສ ລາວ-ຫວຽດນາມ ໃນອະນາຄົດໃຫ້ແໜ້ນແຟ້ນຍິ່ງຂຶ້ນ.
ໂອກາດນີ້, ທ່ານ ພັອ ຫງວຽນ ເລ ກວາງ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງໄດ້ແຈ້ງຈຸດປະສົງໃນການມາຢ້ຽມຢາມໃຫ້ ທ່ານຮອງລັດຖະມົນຕີ ກະຊວງ ປກສ ຮັບຊາບ ໂດຍສະເພາະແມ່ນການເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືລະຫວ່າງ ສອງປະເທດ ກໍຄື ການແລກປ່ຽນຄຳຄິດຄຳເຫັນຕໍ່ກັບບັນຫາສຳຄັນຕ່າງໆ ເພື່ອເປັນການສືບຕໍ່ຮັດແໜ້ນສາຍພົວພັນຮ່ວມມື ລະຫວ່າງ ສອງປະເທດໃນອະນາຄົດ ແລະ ເພື່ອເປັນການຈັດຕັ້ງປະຕິບັດແຜນການຮ່ວມມື ລະຫວ່າງ ກະຊວງ ປກສ ລາວ ແລະກະຊວງ ປກສ ຫວຽດນາມ ທີ່ໄດ້ລົງນາມຮ່ວມກັນ.
ທິບພະຈັນ:ຮຽບຮຽງ