ທາບທາມໃສ່ຮ່າງກົດໝາຍ ວ່າດ້ວຍອົງການກວດກາລັດ ແລະ ຕ້ານການສໍ້ລາດບັງຫຼວງ

ຮັບປະກັນໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີຄວາມໂປ່ງໃສ, ໜັກແໜ້ນ, ຍຸຕິທຳ ແລະ ຖືກຕ້ອງຕາມກົດໝາຍ, ອົງການກວດກາສູນກາງພັກ ແລະ ອົງການກວດກາແຫ່ງລັດ ຈຶ່ງໄດ້ເປີດກອງປະຊຸມທາບທາມຄຳເຫັນໃສ່ຮ່າງກົດໝາຍວ່າດ້ວຍອົງ ການກວດກາລັດ ແລະ ຕ້ານການສໍ້ລາດບັງຫຼວງ ຂຶ້ນ

ໃນວັນທີ 5 ພຶດສະພາ 2022, ທີ່ຄະນະກວດກາສູນກາງພັກ, ໄດ້ຈັດກອງປະຊຸມ ທາບທາມຄຳເຫັນໃສ່ຮ່າງກົດໝາຍວ່າດ້ວຍອົງການກວດກາລັດ ແລະ ຕ້ານການສໍ້ລາດບັງຫຼວງ ຂຶ້ນ, ພາຍໃຕ້ການເປັນປະທານຂອງທ່ານ ສຸກຄຳເພັດ ເຮືອງບຸດສີ ຄະນະປະຈຳພັກ ຮອງປະທານຄະນະກວດກາສູນກາງພັກ, ຮອງປະທານອົງການກວດກາແຫ່ງລັດ ຜູ້ຊີ້ນຳວຽກງານປັບປຸງກົດໝາຍ ໂດຍມີບັນດາຜູ້ຕາງໜ້າຈາກກະຊວງ-ອົງການ, ພ້ອມພາກສ່ວນທີ່ກ່ຽວຂ້ອງເຂົ້າຮ່ວມ. ກອງປະຊຸມຄັ້ງນີ້ ທ່ານ ສຸກຄຳເພັດ ເຮືອງບຸດສີ ໄດ້ຜ່ານຮ່າງກົດໝາຍ ວ່າດ້ວຍ ອົງການກວດກາລັດ ແລະ ຕ້ານການສໍ້ລາດບັງຫຼວງ ສະບັບປັບປຸງ ວ່າ: ການປັບປຸງກົດໝາຍສະບັບນີ້ ແມ່ນເພື່ອໃຫ້ສອດຄ່ອງກັບໜ້າວຽກຕົວຈິງ ແລະ ເພື່ອໃຫ້ວຽກງານດັ່ງກ່າວມີຄວາມເຂັ້ມແຂງ, ສາມາດດຳເນີນໄດ້ຢ່າງມີປະສິດທິພາບ ເພີ່ມທະວີຄວາມສັກສິດຂອງການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມດ້ວຍກົດໝາຍ, ປົກປ້ອງຜົນປະໂຫຍດຂອງລັດ ລວມໝູ່, ທັງສິດ ແລະ ຜົນປະໂຫຍດອັນຊອບທຳຂອງພົນລະເມືອງ ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍປະຕິບັດສິດ ແລະ ໜ້າທີ່ຕິດຕາມ ກວດກາລັດ, ຕ້ານການສໍ້ລາດບັງຫຼວງ ແລະ ຄົ້ນຄວ້າພິຈາລະນາຄຳສະເໜີຂອງພົນລະເມືອງທີ່ກ່ຽວຂ້ອງກັບບຸກຄົນ, ນິຕິບຸກຄົນ ຫຼື ການຈັດຕັ້ງ ແລະ ການເຄື່ອນໄຫວຂອງກະຊວງ, ອົງການລັດທຽບເທົ່າ, ຄະນະເລຂາທິການ, ກຳມາທິການຂອງສະພາແຫ່ງຊາດ ແລະ ການຈັດຕັ້ງອື່ນໆທີ່ນຳໃຊ້ງົບປະມານຂອງລັດ. ທັງນີ້ກໍເພື່ອເປັນການສ້າງເງື່ອນໄຂອຳນວຍຄວາມສະດວກໃຫ້ການເຄື່ອນໄຫວປະຕິບັດໜ້າທີ່ ຂອງອົງການກວດກາລັດ ແລະ ຕ້ານການສໍ້ລາດບັງຫຼວງ ດ້ວຍການວາງນະໂຍບາຍ, ກົດໝາຍ, ລະບຽບການ, ບຸກຄະລາກອນ ລວມທັງ ວັດຖຸອຸປະ ກອນ, ເຕັກນິກ, ເຕັກໂນໂລຊີ ແລະ ອາຄານສະຖານທີ່ເຮັດວຽກ ເພື່ອຮັບປະກັນແກ່ການປະຕິບັດວຽກງານໃຫ້ເຂັ້ມງວດ ມີປະສິດທິພາບ ແນໃສ່ເຮັດໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ມີຄວາມໂປ່ງໃສ, ໜັກແໜ້ນ, ຍຸຕິທຳ ແລະ ຖຶກຕ້ອງຕາມກົດໝາຍ.

ກົດໝາຍ ວ່າດ້ວຍ ອົງການກວດກາລັດ ແລະ ຕ້ານການສໍ້ລາດບັງຫຼວງ ສະບັບປັບປຸງນີ້ ໄດ້ປັບປຸງນະໂຍບາຍຂອງລັດ ກ່ຽວກັບ ວຽກງານອົງການກວດກາລັດ ແລະ ຕ້ານການສໍ້ລາດບັງຫຼວງ, ປັບປຸງຫຼັກການກ່ຽວກັບວຽກງານຂອງອົງການ, ຄວາມຮັບຜິດຊອບ, ສິດ ແລະ ພັນທະ ປະກອບສ່ວນໃນການກວດກາ, ການປົກປ້ອງຜູ້ເຂົ້າຮ່ວມ, ປັບປຸງຂອບເຂດການນຳໃຊ້ກົດໝາຍ ແລະ ປັບປຸງການຮ່ວມມືສາກົນ, ໄດ້ປັບປຸງພາລະບົດບາດ ສິດ ແລະ ໜ້າທີ່ອົງການກວດ ກາແຫ່ງລັດ ແລະ ຕ້ານການສໍ້ລາດບັງຫຼວງ, ພ້ອມທັງວຽກງານການເຄື່ອໄຫວ ບໍ່ວ່າຈະເປັນການກວດກາ, ຮູບການເນື້ອໃນ ແລະ ເປົ້າໝາຍຂອງການກວດກາລັດ ເພື່ອປ້ອງກັນບໍ່ໃຫ້ເກີດມີການສໍ້ລາດບັງຫຼວງໃນການຈັດຕັ້ງ, ນອກນີ້ ຍັງໄດ້ປັບປຸງບັນດາຂໍ້ຫ້າມສຳລັບຜູ້ກວດກາ, ຂໍ້ຫ້າມສຳລັບເປົ້າໝາຍຖືກກວດກາ ແລະ ຂໍ້ຫ້າມສຳລັບບຸກຄົນ, ນິຕິບຸກຄົນ ຫຼື ການຈັດຕັ້ງອື່ນໆອີກ.

ຂ່າວ: ເບັງ

ພາບ: ວິໄລສັກ