ຜົນການຄົ້ນຄວ້າປະຈຳປີ ຄັ້ງທີ 3 ຂອງໂຄງການສ້າງຖານຂໍ້ມູນແຫ່ງຊາດດ້ານໂພຊະນາການ ເຜີຍວ່າ ປັດຈຸບັນ ລາວມີຫຼາຍກວ່າ 1 ໃນ 2 ຂອງຄົວເຮືອນ ຍັງຂາດການບໍລິການດ້ານສຸຂະອະນາໄມຂັ້ນພື້ນຖານ ແລະ ຫຼາຍກວ່າ 2 ໃນ 3 ເດັກນ້ອຍລາວ ດື່ມນ້ຳທີ່ມີການປົນເປື້ອນຂອງເຊື້ອ E.coli ໃນລະດັບສູງ, ດັ່ງນັ້ນ ລັດຖະບານ ຈຶ່ງຈະເລັ່ງໃສ່ລົງທຶນດ້ານໂພຊະນາການຫຼາຍຂຶ້ນ ເພື່ອພັດທະນາທຶນມະນຸດ.
ລັດຖະບານລາວ ຮ່ວມກັບ ອົງການສາກົນ ຈັດກອງປະຊຸມເຜີຍແຜ່ການຄົ້ນຄວ້າ ປະຈໍາປີ ຄັ້ງທີ 3 ຂອງໂຄງ ການສ້າງຖານຂໍ້ມູນແຫ່ງຊາດດ້ານໂພຊະນາການ ຂຶ້ນໃນວັນທີ 26 ເມສາ 2022 ໂດຍການເຂົ້າຮ່ວມເປັນປະທານຂອງ ປອ ສະຖາບັນ ອິນສີຊຽງໃໝ່ ຮອງລັດຖະມົນຕີ ກະຊວງແຜນການ ແລະ ການລົງທຶນ, ທັງເປັນປະທານຄະນະບໍລິຫານງານໂຄງການ, ດຣ ນາງ ເພຍ ເຣເບນໂຣ ບຣີໂຕ (Pia BRITTO) ຕາງໜ້າຈາກອົງການສະຫະປະຊາຊາດປະຈໍາລາວ, ທ່ານ ນາງ ອີນາ ມາຊິວລີໂອນິແຕ (Ina MARČIULIONYTĖ) ເອກອັກຄະລັດຖະທູດສະຫະພາບເອີຣົບ ປະຈໍາລາວ ພ້ອມພາກສ່ວນທີີ່ກ່ຽວຂ້ອງເຂົ້າຮ່ວມ.
ປອ ສະຖາບັນ ອິນສີຊຽງໃໝ່ ໄດ້ກ່າວວ່າ: ວຽກງານດ້ານໂພຊະນາການ ແມ່ນໜຶ່ງວຽກງານບູລິມະສິດ ທີ່ລັດ ຖະບານ ໄດ້ຮ່ວມມືກັບຄູ່ຮ່ວມພັດທະນາ ເອົາໃຈໃສ່ໃນການແກ້ໄຂສະພາບການຂາດໂພຊະນາການໃຫ້ໄດ້ໂດຍໄວ, ພ້ອມທັງ ໄດ້ສ້າງຍຸດທະສາດ ແລະ ແຜນປະຕິບັດການດ້ານໂພຊະນາການຂຶ້ນ ທີ່ໄດ້ກໍານົດບັນດາມາດຕະການທັງທາງກົງ ແລະ ທາງອ້ອມ ໃນການແກ້ໄຂບັນຫາໂພຊະນາການ,ໂຄງການດັ່ງກ່າວມີບົດບາດສຳຄັນຫຼາຍ ທີ່ຈະຊ່ວຍສ້າງຄວາມອາດສາມາດໃນດ້ານການຄຸ້ມຄອງ ແລະ ວິໄຈຂໍ້ມູນຂ່າວສານດ້ານໂພຊະນາການ ເພື່ອສາມາດປະເມີນ ແລະ ສ້າງນະໂຍບາຍຫຼຸດຜ່ອນການຂາດສານອາຫານໃນລາວ, ພ້ອມນັ້ນ ກໍຈະເປັນການສະໜັບສະໜູນການຈັດຕັ້ງປະຕິບັດຍຸດທະສາດ 2025, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX (2021-2025), ເປົ້າໝາຍການພັດທະນາແບບຍືນຍົງໃນປີ 2030
ທ່ານ ນາງ ອີນາ ມາຊິວລີໂອນິແຕ ໄດ້ກ່າວວ່າ: ເພື່ອໃຫ້ບັນລຸເປົ້າໝາຍທີ່ວາງໄວ້ ການເພີ່ມທຶນແກ່ພາກລັດໃນວຽກງານໂພຊະນາການແມ່ນມີຄວາມສຳຄັນຫຼາຍ ໃນການດໍາເນີນງານຂອງແຜນປະຕິບັດງານແຫ່ງຊາດດ້ານໂພຊະນາການໃໝ່ (2021-2025), ເນື່ອງຈາກຜົນຂອງການວິເຄາະ ພົບວ່າ ພາວະການຂາດອາຫານເຮັດໃຫ້ ສປປລາວ ສູນເສຍລວມຍອດຜະລິດຕະພັນພາຍໃນປະເທດຕໍ່ປີເຖິງ 2,66%, ການໃຊ້ຈ່າຍໃນວຽກງານໂພຊະນາການ 204 ລ້ານກວ່າໂດລາ, ໃນນັ້ນ ມາຈາກແຫຼ່ງທຶນພາຍໃນ 19 ລ້ານກວ່າໂດລາ ແລະ ອີກ 184 ລ້ານກວ່າໂຄລາ ແມ່ນມາຈາກທຶນຊ່ວຍເຫຼືອຂອງສາກົນກົນໂດຍຜ່ານຄູ່ຮ່ວມພັດທະນາ.
ດຣ ນາງ ເພຍ ເຣເບນໂຣ ບຣີໂຕ ກ່າວວ່າ: ເພື່ອເຮັດໃຫ້ ສປປລາວ ສາມາດຫຼຸດພົ້ນອອກຈາກປະເທດດ້ອຍພັດ ທະນາໃນປີ 2025, ສະນັ້ນ ສປປລາວ ຕ້ອງໄດ້ເພີ່ມຄວາມພະຍາຍາມຫຼາຍຂຶ້ນ ໃນການຕອບສະໜອງຄວາມໝັ້ນຄົງດ້ານສະບຽງອາຫານ ແລະ ຄວາມຕ້ອງການດ້ານໂພຊະນາການຂອງເດັກນ້ອຍ ແລະ ແມ່ຍິງ, ຈຳເປັນຕ້ອງມີການປະຕິ ບັດແບບຫຼາຍຂະແໜງການຢ່າງຮອບດ້ານ ແລະ ກວ້າງຂວາງ ເພື່ອຈະຮັບປະກັນການປັບປຸງຕົ້ນທຶນມະນຸດທີ່ຈຳເປັນຂອງລາວ, ພວກເຮົາຕ້ອງຮັບປະກັນວ່າລູກຫຼານຂອງພວກເຮົາ ພວກເຂົາສາມາດມີທ່າແຮງໃນການຈະເລີນເຕີບໂຕໄດ້ຢ່າງເຕັມສ່ວນ ໃນສະພາບແວດລ້ອມທີ່ປອດໄພ ແລະ ມີສຸຂະພາບທີ່ດີ.
ສໍາລັບ ຜົນການຄົ້ນຄວ້າ ປະຈໍາປີ ຄັ້ງທີ 3 ຂອງໂຄງການສ້າງຖານຂໍ້ມູນແຫ່ງຊາດດ້ານໂພຊະນາການ ຍັງເຫັນວ່າ ປັດຈຸບັນນີ້ ມີຫຼາຍກວ່າ 1 ໃນ 2 ຂອງຄົວເຮືອນໃນລາວ ຍັງຂາດການບໍລິການດ້ານສຸຂະອະນາໄມຂັ້ນພື້ນຖານ ແລະ ຫຼາຍກວ່າ 2 ໃນ 3 ຂອງເດັກນ້ອຍລາວ (71,6%) ດື່ມນໍ້າທີ່ມີການປົນເປື້ອນຂອງເຊື້ອ E. coli ໃນລະດັບສູງ, ສະນັ້ນ ການແກ້ໄຂຄວາມແຕກຕ່າງກັນດ້ານໂພຊະນາການ ຈຳເປັນຕ້ອງມີສຸຂາພິບານຂັ້ນພື້ນຖານ, ລວມທັງການເຂົ້າເຖິງສິ່ງອຳນວຍຄວາມສະດວກໃນການລ້າງມືດ້ວຍສະບູ ແລະ ການປັບປຸງດ້ານສຸຂະອະນາໄມ, ຈຶ່ງຊ່ວຍຫຼຸດອັດຕາການຈ່ອຍຜອມຂອງເດັກນ້ອຍລາວລົງໄດ້ເຖິງ 50%.
ຂ່າວ: ຈັນດອນ
ພາບ: ແສງອາລຸນ