ໃນປີ 2022 ການປູກເຂົ້ານາແຊງ ຢູ່ເມືອງໄຊຍະບູລີ ແຂວງໄຊຍະບູລີ ແມ່ນປູກເຂົ້າດ້ວຍເຕັກນິກໃໝ່ຂອງຊາວຈີນ ໃນເນື້ອທີ່ 38 ເຮັກຕາ ຄາດສະມັດຕະພາບຈະໄດ້ 6 ໂຕນຕໍ່ເຮັກຕາ
ທ່ານ ລີຈົ່ງຊວນ ຫົວໜ້າ ບໍລິສັດ ເຕັກໂນໂລຊີ ກະສິກໍາ ອາຊີປາຊີຟິກ ທັງເປັນວິຊາການດ້ານເຕັກນິກ ໄດ້ບອກວ່າ: ການປູກເຂົ້າດ້ວຍເຕັກໃໝ່ທີ່ທັນສະໄໝ ຢູ່ເມືອງໄຊຍະບູລີ ປີນີ້ ແມ່ນເປັນປີທໍາອິດ ໃນເນື້ອທີ່ 38 ເຮັກຕາ, ພາຍຫຼັງທີ່ໄດ້ຕົກກ້າຄົບ 30 ວັນ ກໍໄດ້ເລີ່ມລົງມືປູກ ໂດຍການຈັດເປັນແຖວຄື: ແຖວໃຫຍ່ກວ້າງ 1 ແມັດ ແມ່ນປູກເຂົ້າແມ່ ແລະ ແຖວນ້ອຍກວ້າງ ປະມານ 30 ຊັງຕີແມັດ ແມ່ນປູກເຂົ້າຜູ້, ການປູກແມ່ນຈະໄດ້ປູກເຂົ້າຜູ້ກ່ອນ 1 ອາທິດ ແລ້ວຈຶ່ງປູກເຂົ້າແມ່ຕາມຫຼັງ, ການປູກໃຫ້ມີເຂົ້າຜູ້ ແລະ ເຂົ້າແມ່ນີ້ແມ່ນເພື່ອເອົາເກສອນຂອງເຂົ້າຜູ້ມາປະສົມພັນກັບເຂົ້າແມ່ ໂດຍແມ່ນຄົນເຮົາຊ່ວຍໃນການປະ ສົມພັນຄື: ພາຍຫຼັງທີ່ເຂົ້າຜູ້ ແລະ ເຂົ້າແມ່ເລີ່ມອອກຮວງແລ້ວ ກໍໄດ້ເອົາເຊືອກຈັບຄົນລະສົ້ນແລ້ວລາກເພື່ອໃຫ້ເກສອນເຂົ້າຜູ້ລົ່ນໃສ່ເກສອນເຂົ້າແມ່, ຫຼັງຈາກເຂົ້າໄດ້ອາຍຸ 120 ວັນ ກໍຈະສາມາດເກັບກ່ຽວ, ສະມັດຖະພາບຈະໄດ້ 6 ໂຕນຕໍ່ເຮັກຕາ, ໃນນີ້: ເຂົ້າແມ່ໄດ້ 4 ໂຕນຕໍ່ເຮັກຕາ ແລະ ເຂົ້າຜູ້ໄດ້ 2 ໂຕນຕໍ່ເຮັກຕາ, ເຂົ້າດັ່ງກ່າວແມ່ນເຮັດເປັນແນວພັນເພື່ອສົ່ງໄປປູກຕໍ່ທີ່ ຫວຽດນາມ.
ສຳລັບ ການປູກເຂົ້າ ຢູ່ເມືອງໄຊຍະບູລີ ໃນປີຕໍ່ໜ້າແມ່ນຈະປູກໃຫ້ໄດ້ 60 ເຮັກຕາຂຶ້ນໄປ ແລະ ຈະສົ່ງເສີມໃຫ້ປະຊາຊົນມາປູກເຂົ້າດ້ວຍເຕັກນິກໃໝ່ ເພື່ອຂາຍໃຫ້ກັບບໍລິສັດ ໃນລາຄາຕາມທ້ອງຕະ ຫຼາດ.
ທີ່ມາ ແລະ ພາບ: ໜັງສືພິມປະຊາຊົນ