ໃນວັນທີ 6 ເມສາ 2022, ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈໍາປາສັກ ພ້ອມດ້ວຍຄະນະນຳ, ພະແນກການທີ່ກ່ຽວຂ້ອງ ໄດ້ເຄື່ອນໄຫວພົບປະໂອ້ລົມ ປະຊາຊົນ ກຸ່ມບ້ານ ໜອງໄຮໂຄກ ເມືອງໂພນທອງ ພ້ອມກັນນັ້ນກໍ່ໄດ້ ຊຸກຍູ້-ຊີ້ນຳ ການຈັດຕັ້ງປະຕິບັດວຽກງານການພັດທະນາຮອບດ້ານ ຂອງກຸ່ມດັ່ງກ່າວ. ໂດຍມີ ທ່ານ ສຸພາບ ທຳມະຮັກສາ ເຈົ້າເມືອງໂພນທອງ ພ້ອມຄະນະ, ມີ ອຳນາດການປົກຄອງ, ຕະຫຼອດຮອດພໍ່ແມ່ປະຊາຊົນ ກຸ່ມບ້ານ ໜອງໄຮໂຄກ ໃຫ້ການຕ້ອນຮັບ.
ທ່ານ ວິໃນ ບຸນປະກອບ ເລຂາຄະນະພັກຮາກຖານ, ໄດ້ລາຍງານສະພາບລວມຂອງກຸ່ມບ້ານ ແລະຜ່ານການຈັດຕັ້ງປະຕິບັດສາມາດຕີລາຄາດ້ານດີ ຍ້ອນໄດ້ຮັບການຊີ້ນຳ ຢ່າງໃກ້ຊິດຈາກຄະນະພັກຂັ້ນເທິງ ແລະຍ້ອນຄວາມຮັບຜິດຊອບ ແລະຄວາມສາມັກຄີຂອງພໍ່ແມ່ປະຊາຊົນ ໃນການພັດທະນາ ແລະ ໃນປີ 2018 ພາຍໃນກຸ່ມ ໄດ້ຮັບນາມມະຍົດ ບ້ານສາມັກຄີປອງດອງ ບ້ານຢຸດຖ່າຍຊະຊາຍ ແລະໄດ້ສືບຕໍ່ນຳພາພໍ່ແມ່ປະຊາຊົນສ້າງບ້ານ ພັດທະນາ ປະຊາຊົນ ຢູ່ດີ ກິນດີ. ການຈັດຕັ້ງປະຕິບັດວຽກງານນຳພາ ໄດ້ຊຸກຍູ້ພໍ່ແມ່ປະຊາຊົນສ້າງເສດຖະກິດຮອບດ້ານ, ການຜະລິດເຂົ້ານາປີ, ປູກພືດ, ລ້ຽງສັດ, ສ້າງວຽກເຮັດງານທຳເຮັດໃຫ້ເສດຖະກິດບຸກຄົນ, ຄອບຄົວດີຂຶ້ນເປັນກ້າວໆ, ພໍ່ແມ່ປະຊາຊົນ ຍັງປະກອບສ່ວນທຶນຮອນ ແລະແຮງງານເຂົ້າໃນການກໍ່ສ້າງ ເສັ້ນທາງເບຕົງພາຍໃນບ້ານ ຄວາມຍາວ 3.319 ແມັດ ມູນຄ່າ 225 ລ້ານກີບ. ແລະ ການສ້າງພື້ນຖານໂຄງລ່າງ ນັບແຕ່ປີ 2010-2022 ລວມມູນຄ່າໃນການຊື້ວັດຖຸທັງໝົດ 921 ລ້ານກີບ, ສຳເລັດໄປແລ້ວ 93% ແລະ ສູ້ຊົນ ໃຫ້ສໍາເລັດພານໃນປີ 2023. ບ້ານໜອງໄຮໂຄກ ແມ່ນ ມີ 2 ຄຸ້ມບ້ານຄື : ຄຸ້ມໝອງໄຮ ແລະ ຄຸ້ມມີໃຊ, ມີ 540 ຫຼັງຄາເຮືອນ,ມີ 515 ຄອບຄົວ, ພົນລະເມືອງມີ 2.440 ຄົນ, ມີເນື້ອທີ່ທັງໝົດ 946,76 ເຮັກຕາ. ດິນກະສິກໍາ 915,16 ເຮັກຕາ,ດິນປູກສ້າງ 319,91 ເຮັກຕາ ພໍ່ແມ່ນປະຊາຊົນ ຖືອາຊີບປູກ ເຂົ້ານາປີກວມ 95% ຄ້າຂາຍ ແລະອື່ນໆ.
ໃນໂອກາດນີ້, ທ່ານ ວິໄລວົງ ບຸດດາຄໍາ ກໍໄດ້ມີຄຳເຫັນໂອ້ລົມ ເຊິ່ງໄດ້ສະແດງຄວາມຍ້ອງຍໍຊົມເຊີຍ ແລະຕີລາຄາສູງຕໍ່ການຊີ້ນຳ-ນຳພາ ແຕ່ລະຂັ້ນ ແລະນ້ຳໃຈສາມັກຄີຂອງພໍ່ແມ່ປະຊາຊົນ ໃນການພັດທະນາ ກຸ່ມບ້ານໜອງໄຮໂຄກ ເມືອງໂພນທອງ. ພ້ອມນັ້ນກໍ່ໄດ້ ເນັ້ນໃຫ້ຄະນະພັກ, ອົງການປົກຄອງເມືອງ ແລະ ບ້ານ ຕ້ອງໄດ້ສືບຕໍ່ໃນການສຶກສາອົບຮົມການເມືອງແນວຄິດ ໃຫ້ປະຊາຊົນເຂດ ດັ່ງກ່າວໃຫ້ສູງຂື້ນ, ສືບຕໍ່ໃນການສ້າງບ້ານເປັນຫົວໜ່ວຍພັດທະນາ ສ້າງບ້ານໃຫຍ່ໃຫ້ກາຍເປັນຕົວເມືອງນ້ອຍໃນຊົນນະບົດ, ໃນການຈັດຕັ້ງປະຕິບັດຄໍາສັ່ງແນະນໍາ ເລກທີ 03/ກມສພ, ມະຕິ 25/ກມສພ ວ່າດ້ວຍວຽກງານສາມສ້າງ, ມະຕິ 056/ກມສພ ວ່າດ້ວຍການປັບປຸງຮາກຖານການເມືອງລະບອບປະຊາທິປະໄຕ ປະຊາຊົນ ໃຫ້ເຂັ້ມແຂງ, ໜັກແໜ້ນ, ຄໍາສັ່ງ 097/ກມສພ ວ່າດ້ວຍການເພີ່ມທະວີ ວຽກງານພັດທະນາຊົນນະບົດຮອບດ້ານໃນໄລຍະໃໝ່ ແລະ ດໍາລັດ 348/ລບ ແລະ ບັນດານິຕິກຳຂອງແຂວງວາງອອກ. ແລະໃນໂອກາດດັ່ງກ່າວ, ທ່ານເຈົ້າແຂວງຈຳປາສັກ ພ້ອມຄະນະ ຍັງໄດ້ມອບ ຄອບພິວເຕີ້ຈຳນວນ 1ຊຸດ, ແລະເຄື່ອງຮັບໃຊ້, ພ້ອມທັງ ໄດ້ ມອບໃບຍ້ອງຍໍ ເຈົ້າແຂວງຈຳປາສັກ ໃຫ້ ຄະນະພັກ-ອໍານາດການປົກຄອງ-ພໍ່-ແມ່ປະຊາຊົນ ບ້ານໜອງໄຮໂຄກ ເມືອງໂພນທອງ ແຂວງຈໍາປາສັກ ເພື່ອເປັນການຍ້ອງຍໍສັນລະເສີນຜົນງານ ປະກອບສ່ວນທາງດ້ານທຶນຮອນເຂົ້າໃນວຽກງານກໍ່ສ້າງພື້ນຖານໂຄງລ່າງສ້າງ ເສັ້ນທາງເບຕົງ ເຂົ້າບ້ານ.
ຂ່າວ: ແຂວງຈຳປາສັກ
ບກ: ຮຽບຮຽງ