ພະແນກອຸດສາຫະກໍາ ແລະ ການຄ້າ ແຂວງໄຊສົມບູນ ລົງເກັບກໍາຂໍ້ມູນ ການຮັບເກັບຊື້ສິນຄ້າກະສິກໍາ ຢູ່ຕະຫຼາດລາວຂາຍຍົກ-ຂາຍຍ່ອຍນະຄອນຫຼວງວຽງຈັນ ແລະ ບໍລິສັດ ລາວອຸດສາຫະກໍາ-ກະສິກໍາ ຈໍາກັດ (ໂຮງງານຫຼຸມຄໍາ) ແຂວງວຽງຈັນ. 

ທ່ານ ພາທໍ່ ຕົ່ງເຢີທໍ່, ຮັກສາການຫົວໜ້າພະແນກອຸດສາຫະກໍາ ແລະ ການຄ້າ ແຂວງໄຊສົມບູນ ພ້ອມດ້ວຍພະນັກງານຂະແໜງທີ່ກ່ຽວຂ້ອງ ພາຍໃນພະແນກ ໄດ້ສົມທົບກັບບໍລິສັດ ພູເບ້ຍມາຍນິ່ງ ລົງເກັບກໍາຂໍ້ມູນ ການຮັບເກັບຊື້ສິນຄ້າກະສິກໍາ ຢູ່ຕະຫຼາດລາວຂາຍຍົກ-ຂາຍຍ່ອຍ, ນະຄອນຫຼວງວຽງຈັນ ໂດຍການຕ້ອນຮັບຂອງທ່ານ ບຸນທ່ຽງ ລັດຕະນະວົງ, ປະທານຕະຫຼາດລາວຂາຍຍົກ-ຂາຍຍ່ອຍ, ຈາກນັ້ນທິມງານໄດ້ລົງເຮັດວຽກຢູ່ບໍລິສັດ ລາວອຸດສາຫະກໍາ-ກະສິກໍາ ຈໍາກັດ (ໂຮງງານຫຼຸມຄໍາ), ແຂວງວຽງຈັນ, ໃນນັ້ນ ໄດ້ຈັດກອງປະຊຸມປືກສາຫາລືກັນ ລະຫວ່າງ ສອງຝ່າຍ ໂດຍໃນກອງປະຊຸມຜູ້ເຂົ້າຮ່ວມ ໄດ້ເຫັນດີເປັນເອກະພາບກັນ ຄື:

1. ຕະຫຼາດລາວຂາຍຍົກ-ຂາຍຍ່ອຍ ນະຄອນຫຼວງວຽງຈັນ ຈະຮັບຊື້ສິນຄ້າກະສິກຳ ຈາກແຂວງໄຊສົມບູນ ເປັນຕົ້ນ: ຜັກກະລ່ຳປີ, ຜັກກາດຂາວ, ຜັກກາດຕີນໝີ, ໝາກເຜັດ, ໝາກຊູ, ໝາກນັດ, ຂີງ, ໝາກກ້ຽງ ແລະ ພືດຜັກປະເພດ ອື່ນໆອີກ. ນອກນີ້ ທັງຕະຫຼາດລາວຂາຍຍົກ-ຂາຍຍ່ອຍ, ນະຄອນຫຼວງວຽງຈັນ ຍັງຈະສະໜອງສິນຄ້າປະເພດ: ເຂົ້າສານ, ຊີ້ນໝູ, ຊີ້ນໄກ່, ໄຂ່ໄກ່, ປາ, ອາຫານທະເລ, ອາຫານແຊ່ແຂງ, ສິນຄ້າປຸງແຕ່ງ, ເຄື່ອງປຸງ, ພືດຜັກ, ໝາກໄມ້ ແລະ ອື່ນໆ ໃຫ້ແຂວງໄຊສົມບູນ ຕື່ມອີກ.

2. ບໍລິສັດ ລາວອຸດສາຫະກໍາ-ກະສິກໍາ ຈໍາກັດ (ໂຮງງານຫຼຸມຄໍາ) ບ້ານເກິນ, ແຂວງວຽງຈັນ ຊຶ່ງເປັນໂຮງງານຜະລິດນໍ້າສາລີຫວານ, ນໍ້າໝາກນັດ, ນໍ້າໝາກພ້າວ, ຜະລິດສາລີກ່ອງ ເພື່ອສົ່ງຈໍາໜ່າຍຂາຍພາຍໃນ ແລະ ຕ່າງປະເທດ ຈະສະ  ໜອງ ແລະ ຊ່ວຍດ້ານຄູຝຶກ ໃນການຜະລິດປຸງແຕ່ງກວນໝາກນັດ ໃຫ້ແຂວງໄຊສົມບູນ.

 ທັງນີ້ ກໍເພື່ອຮັບປະກັນໃຫ້ປະຊາຊົນ ພາຍໃນແຂວງໄຊສົມບູນ ໄດ້ມີຕະຫຼາດຈໍາໜ່າຍສິນຄ້າ ທີ່ໝັ້ນຄົງ, ສາ ມາດຮອງຮັບຜົນຜະລິດ ໄດ້ຢ່າງແນ່ນອນ. ພ້ອມທັງ ຍັງເປັນການສ້າງໃຫ້ປະຊາຊົນມີແຮງງານຈູງໃຈ ໃນການຫັນມາຜະລິດກະສິກໍາເປັນສິນຄ້າ ໃຫ້ນັບມື້ນັບຫຼາຍຂຶ້ນເລື່ອຍໆ ເພື່ອໃຫ້ເຂົາເຈົ້າມີລາຍຮັບເຂົ້າໃນຄອບຄົວ ຮັບປະກັນໃຫ້ຄອບຄົວສາມາດຫຼຸດພົ້ນອອກຈາກຄວາມທຸກຍາກ ເທື່ອລະກ້າວ.