ເພື່ອເປັນການເພີ່ມທະວີການນຳພາ-ຊີ້ນຳຈັດຕັ້ງປະຕິບັດວາລະແຫ່ງຊາດວ່າດ້ວຍການສະກັດກັ້ນ ແລະ ແກ້ໄຂບັນຫາຢາເສບຕິດໂດຍສະເພາະຢູ່ແຂວງຄຳມ່ວນ, ໃຫ້ເຂົ້າສູ້ລວງເລິກ ແລະ ກວ້າງຂວາງ ສະນັ້ນໃນເວລາ 11:00 ໂມງຂອງວັນທີ 20 ມີຖຸນາ 2022 ທາງເຈົ້າໜ້າທີ່ພະແນກຕຳຫຼວດສະກັດກັ້ນ ແລະ ຕ້ານຢາເສບຕິດ ປກສ ແຂວງຄຳມ່ວນ, ສາມາດຈັບຕົວກຸ່ມແກ໋ງຜູ້ຊາຍໄວລຸ້ນຈຳນວນໜຶ່ງທີ່ກຳລັງມົ້ວສຸມເສບຢາເສບຕິດຢູ່ພາຍໃນເຮືອນ ເຂດບ້ານສົມສະອາດ ເມືອງທ່າແຂກ ແຂວງຄຳມ່ວນ, ຈຳນວນ 13 ຄົນ, ພ້ອມຂອງກາງຢາບ້າ ຈຳນວນ 94 ເມັດ. ນຳມາສືບສວນ-ສອບສວນ ແລະ ສຶກສາອົບຮົມ.
ຜ່ານການສືບສວນ-ສອບສວນເບື້ອງຕົ້ນຂອງເຈົ້າໜ້າທີ່ ຈຶ່ງຮູ້ວ່າ: ຜູ້ຖືກຫາມີທ້າວ ໂຈ໋ນ ອາຍຸ 29 ປີ, ປະຊາຊົນຢູ່ບ້ານ ສົມສະອາດ, ທ້າວ ວິໄລສັກ ອາຍຸ 29 ປີ,ຢູ່ບ້ານສົມສະອາດ, ທ້າວ ບຸນມີ ອາຍຸ 23 ປີ, ຢູ່ບ້ານນາບົງ, ທ້າວ ພອນສະຫວັນ ອາຍຸ 32 ປີ,ຢູ່ບ້ານເລົ່າໂພໄຊ, ທ້າວ ບຸນຫຼາຍ ອາຍຸ 32 ປີ, ຢູ່ບ້ານປາກຊີມັງ, ທ້າວ ກູກ່າ ອາຍຸ 34 ປີ ປະຊາຊົນຢູ່ບ້ານສັນຕິສຸກ, ທ້າວພຸດທະສອນ ອາຍຸ 31 ປີ, ຢູ່ບ້ານໂພນສະໜາມ, ທ້າວ ຄູນແກ້ວ ອາຍຸ 25 ປີ,ຢູ່ບ້ານສົມສະອາດ, ທ້າວ ມີສຸກ ອາຍຸ 25 ປີ,ຢູ່ບ້ານຈອມແຈ້ງ, ທ້າວ ກູ ອາຍຸ 30 ປີ, ປະຊາຊົນຢູ່ບ້ານ ສົມສະອາດ, ທ້າວ ແສງເພັດ ອາຍຸ 32 ປີ, ປະຊາຊົນຢູ່ບ້ານ ສົມສະອາດ,ທ້າວ ບຸນເຫຼືອ ອາຍຸ 32 ປີ,ຢູ່ບ້ານຈອມທອງ ແລະ ທ້າວ ໂດ່ມິງເສີນ ອາຍຸ 31 ປີ, ເຊື້ອຊາດ ແລະ ສັນຊາດ ຫວຽດນາມ, ປັດຈຸບັນແມ່ນເປັນກຳມະກອນ ເຮັດວຽກຢູ່ບ້ານວຽງວິໄລ, ເມືອງທ່າແຂກ ແຂວງຄຳມ່ວນ. ພວກກ່ຽວທັງໝົດນີ້ ທາງເຈົ້າໜ້າຕຳຫຼວດວິຊາສະເພາະແມ່ນໄດ້ກັກຕົວ ເພື່ອມາສຶກສາອົບຮົມ ພ້ອມທັງສຶບສວນ-ສອບສວນ ເພື່ອຂະຫຍາຍຜົນຫາພວກຮ່ວມຂະບວນການລາຍນ້ອຍ ລາຍໃຫຍ່ມາດຳເນີນຄະດີຕາມລະບຽບກົດໝາຍ ເພື່ອສະກັດກັ້ນບັນຫາຢາເສບຕິດດັ່ງກ່າວນັ້ນ ໃຫ້ຫຼຸດໜ່ອຍຖອຍລົງ ແລະ ໝົດໄປຈາກສັງຄົມ.