ໃນຕອນເຊົ້າຂອງວັນທີ 21 ມິຖຸນາ 2022, ທີ່ກະຊວງການຕ່າງປະເທດ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ນາງ ແອນນາ ເອັດສເຕີ ວຽນທ໌ ວານເດັດສ ເອກອັກຄະລັດຖະທູດ ແຫ່ງ ສາທາລະນະລັດກູບາ ປະຈໍາ ສປປລາວ ຄົນໃໝ່.
ໃນໂອກາດນີ້, ທ່ານ ສະເຫລີມໄຊ ກົມມະສິດ ໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍ ທີ່ທ່ານທູດໄດ້ຮັບແຕ່ງຕັ້ງເປັນເອກອັກຄະລັດຖະທູດກູບາ ປະຈຳ ສປປ ລາວ ແລະ ເຊື່ອໝັ້ນວ່າທ່ານທູດຈະປະກອບສ່ວນອັນສຳຄັນເຂົ້າໃນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ລະຫວ່າງສອງປະເທດໃຫ້ນັບມື້ແຕກດອກອອກຜົນຍິ່ງໆຂຶ້ນ ເພື່ອນໍາເອົາຜົນປະ ໂຫຍດມາໃຫ້ປະຊາຊົນສອງຊາດ.
ທ່ານ ນາງແອນນາ ເອັດສເຕີ ວຽນທ໌ ວານເດັດສ ໄດ້ສະແດງຄວາມຍິນດີ ແລະ ເປັນກຽດທີ່ຖືກແຕ່ງຕັ້ງມາເປັນທູດກູບາ ປະຈໍາ ສປປ ລາວພ້ອມທັງໃຫ້ຄໍາໝັ້ນສັນຍາ ຈະຕັ້ງໃຈປະຕິບັດໜ້າທີ່ຂອງຕົນຢ່າງສຸດຄວາມສາມາດ ເພື່ອສືບຕໍ່ປະກອບສ່ວນເຂົ້າໃນການສົ່ງເສີມ ການພົວພັນຮ່ວມມືສອງຝ່າຍ ລາວ ແລະ ກູບາ ໃນດ້ານຕ່າງໆ ໃຫ້ມີປະສິດທິພາບປະສິດທິຜົນໃນອະນາຄົດ. ພ້ອມນັ້ນ ໄດ້ແຈ້ງບາງແຜນ ການ ແລະແຜນງານໃນການຊຸກຍູ້ສົ່ງເສີມການພົວພັນ ເປັນຕົ້ນ ການແລກປ່ຽນການຢ້ຽມຢາມຂອງຄະ ນະຜູ້ແທນຂັ້ນສູງຂອງສອງປະເທດ, ການຊຸກຍູ້ສົ່ງເສີມການຮ່ວມມືດ້ານເສດຖະກິດ, ສາທາ, ສຶກສາ, ກິ ລາ ແລະ ອື່ນໆ. ພ້ອມທັງ ໄດ້ສະແດງຄວາມຂອບໃຈ ຕໍ່ທ່ານຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ທີ່ຮັບການເຂົ້າຢ້ຽມຂໍ່ານັບໃນຄັ້ງນີ້.
ໃນໂອກາດພົບປະດັ່ງກ່າວ, ສອງຝ່າຍຍັງໄດ້ຕີລາຄາສູງຕໍ່ການພົວພັນຮ່ວມມືທີ່ເປັນມູນເຊື້ອດີງາມມາແຕ່ດົນນານ, ບົນພື້ນຖານແຫ່ງການເຂົ້າອົກເຂົ້າໃຈ ແລະ ຊ່ວຍເຫລືອ ເຊິ່ງກັນ ແລະ ກັນ ທັງໃນຂອບສອງຝ່າຍ ແລະ ຫລາຍຝ່າຍຕະຫລອດໄລຍະທີ່ຜ່ານມາ ຈົນເຖິງປະຈຸບັນເຊິ່ງສະແດງອອກໃນການໄປມາ ຫາສູ່ແລກປ່ຽນການຢ້ຽມຂອງການນໍາຂັ້ນສູງຂອງສອງປະເທດ ແລະ ການສະໜັບສະໜູນຊ່ວຍເຫລືອ ເຊິ່ງກັນ ແລະ ກັນໃນຂົງເຂດຕ່າງໆ.