ໂດຍອີງຕາມແຈ້ງການເພີ່ມເຕີມ ຂອງຄະນະກຳມະການ ປກຊ-ປກສ ແຂວງໄຊສົມບູນ ເລກທີ 348/ປຊ-ປສ,ຊບ ວ່າດ້ວຍການເລີກຮື້ອາວຸດເຖື່ອນ, ປືນແກັບ, ປືນປໍ້, ທາດແຕກ, ທາດລະເບີດ ແລະ ອີງຕາມການເກັບກູ້ທ້ອນໂຮມເຄື່ອງຂອງກາງຄະດີ ທີ່ໄດ້ດຳເນີນສຳນວນຄະດີສຳເລັດ ດັ່ງນັ້ນ, ມາໃນວັນທີ 15 ມິຖຸນາ 2022 ນີ້ຫ້ອງຕຳຫຼວດ ປກສ ແຂວງ ໄດ້ນຳເອົາອາວຸດເສິກ, ອາວຸດລ່າເນື້ອ ມາມອບໃຫ້ກັບຫ້ອງຄຸ້ມຄອງສຳມະໂນຄົວ ແລະ ກໍ່ສ້າງຮາກຖານ ເພື່ອນຳໄປເກັບຮັກສາ ແລະ ທຳລາຍຖິ້ມ ຕາງໜ້າກ່າວມອບຂອງທ່ານ ພັທ ດາວັນ ດວງມະນີຮອງຫ້ອງຕຳຫຼວດ ແລະ ກ່າວຮັບໂດຍ ພັທ ເພັດສະໝອນ ສີໄພວັນ ຫົວໜ້າພະແນກອາຊີບ-ພະຫະນະພິເສດ ໃນນັ້ນປືນທີນຳມາມອບຄັ້ງນີ້ມີ: ປືນເຊກາ CK 02 ກະບອກ, ປືນອາກ່າ AK 01 ກະບອກພ້ອມດ້ວຍລູກປືນ 17 ລູກ, ປືນສັ້ນເຊເປ CP 01 ກະບອກພ້ອມດ້ວຍລູກປືນ 07 ລູກ, ກາບິ່ນ 01 ກະບອກ, ປືນແວ່ງດັດແປງ 01 ກະບອກ, ປືນລົມ 02 ກະບອກ, ປືນລູກຊອງດັດແປງ 02 ກະບອກ, ປືນດັດແປງຍິງລູກຕະປູຄອນກີດ 21 ກະບອກ, ປືນສັ້ນດັດແປງ 03 ກະບອກ, ໝາກແຕກ 01 ໜ່ວຍ ແລະ ບູ່ມບີ້ 01 ໜ່ວຍ.
ທິບພະຈັນ:ຮຽບຮຽງ