ໃນວັນທີ 8 ມີຖຸນາ 2022 ເວລາ 11:10 ໂມງ ເຈົ້າໜ້າທີ່ກົມຕໍາຫຼວດສະກັດກັ້ນ ແລະ ຕ້ານຢາເສບຕິດ ກົມໃຫຍ່ຕຳຫຼວດ ໄດ້ມ້າງຄະດີກຸ່ມຄ້າ-ຂາຍຢາເສບຕິດ, ທີ່ໄດ້ເຄື່ອນໄຫວລັກລອບຄ້າ-ຂາຍຢາເສບຕິດຢູ່ເຂດທາງ 450 ປີ ເມືອງໄຊທານີ ນະຄອນຫຼວງວຽງຈັນ, ສາມາດຈັບຕົວຜູ້ຖືກຫາໄດ້ 2 ຄົນ, ຢຶດຂອງກາງຢາເສບຕິດປະເພດຢາບ້າໄດ້ຈຳນວນ 50 ມັດ ເທົ່າກັບ 100.000 ເມັດ, ນ້ຳໜັກ 10,8 ກິໂຣກຼາມ, ໂທລະສັບ 1 ເຄື່ອງ, ປືນດັດແປງ 3 ກະບອກ ແລະ ລູກປືນ 21 ລູກ. ຜູ້ຖືກຫາ ຊື່ ທ້າວ ວັດທະນາ ຫຼື ເປົາ ອາຍຸ 29 ປີ, ກຳມະກອນ ບ້ານ ໂຊກໃຫຍ່ ແລະ ນາງ ເມກຂະຫຼາ ຫຼື ນ້ອຍ ອາຍຸ 30 ປີ, ວ່າງງານທັງສອງຢູ່ບ້ານ ໂຊກໃຫຍ່ ເມືອງ ໄຊເສດຖາ, ນະຄອນຫຼວງວຽງຈັນ.
ຜ່ານການສືບສວນ-ສອບສວນເບື້ອງຕົ້ນຂອງເຈົ້າໜ້າທີ່ ຜູ້ຖືກຫາໄດ້ໃຫ້ການຮັບສາລະພາບວ່າ: ຢາເສບຕິດ ຈຳນວນດັ່ງກ່າວແມ່ນຢູ່ໃນການຄອບຄອງຂອງຕົນແທ້ ເຊິ່ງໄດ້ມາຈາກ ຜູ້ຮ່ວມຂະບວນການ (ບໍ່ຮູ້ຊື່ ແລະ ທີ່ຢູ່) ໃຫ້ໄປສົ່ງຂາຍ ແຕ່ບໍ່ທັນໄດ້ຂາຍ ຖືກເຈົ້າໜ້າທີ່ຈັບຕົວມາດຳເນີນຄະດີກ່ອນ. ຄະດີດັ່ງກ່າວຢູ່ຂັ້ນຕອນການສືບສວນ-ສອບສວນຂະຫຍາຍຜົນຫາກຸ່ມແກ້ງ, ພັກພວກເຄືອຄ່າຍມາດຳເນີນຄະດີຕາມລະບຽບກົດໝາຍ.
ຕໍ່ກັບບັນດາດັ່ງກ່າວ, ເຈົ້າໜ້າທີ່ ຈຶ່ງຮຽກຮ້ອງມາຍັງພະນັກງານ ທະຫານ, ຕຳຫຼວດ, ພໍ່ແມ່ປະຊາຊົນບັນດາເຜົ່າທຸກຊັ້ນຄົນໃນສັງຄົມ ຈົ່ງພ້ອມກັນຊ່ວຍເປັນຫູເປັນຕາ, ຖ້າພົບເຫັນບຸກຄົນ ຫຼື ກຸ່ມຄົນບໍ່ດີທີ່ເຄື່ອນໄຫວພົວພັນກັບຢາເສບຕິດທຸກປະເພດ ໃຫ້ລາຍງານຕໍ່ເຈົ້າໜ້າທີ່ ທີ່ກ່ຽວຂ້ອງ ເພື່ອສະກັດກັ້ນ ປ້ອງກັນ ແລະ ເຮັດໃຫ້ຢາເສບຕິດໝົດໄປຈາກສັງຄົມລາວເຮົາ.
ທິບພະຈັນ:ຮຽບຮຽງ