ທ່ານ ປອ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ,ປະທານສະມາຄົມອຸດສາຫະກໍາຕັດຫຍິບລາວ ໄດ້ໃຫ້ສໍາພາດກັບທີມຂ່າວເສດຖະກິດ ໂທລະພາບ ນວ ວ່າ: ຜົນກະທົບຈາກໂຄວິດ-19 ເຮັດໃຫ້ການດໍາເນີນທຸລະກິດຂະແໜງຕັດຫຍິບ ມີຄວາມຫຍຸ້ງຍາກຫຼາຍດ້ານ ເຊັ່ນ: ການສົ່ງອອກຫຼຸດລົງ ເນື່ອງຈາກຄວາມບໍ່ສົມດຸນລະຫວ່າງການສັ່ງຊື້ ກັບການຮັບແຮງງານເຂົ້າໃນສາຍການຜະລິດ ບາງໄລຍະຍັງບໍ່ເຕັມສ່ວນ, ນອກນນັ້ນ ຄ່າໃຊ້ຈ່າຍໃນການດໍາເນີນການນໍາເຂົ້າວັດຖຸດິບ ແລະ ການນໍາສົ່ງອອກມີຂັ້ນຕອນເພີ່ມຂື້ນ, ສູນເສຍກໍາລັງແຮງງານ ຜູ້ຢ້ານຕິດໂຄວິດ-19 ແລະ ມີການປິດການສັນຈອນໄລຍະໜຶ່ງ, ມີຄ່າໃຊ້ຈ່າຍເພີ່ມຂື້ນ ໃນການຮັບມືກັບໂຄວິດ19 ແລະ ການປິ່ນປົວຜູ້ຕິດເຊື້ອ ເຮັດໃຫ້ຜູ້ປະກອບການມີກໍາໄລໜ້ອຍ.
ປັດຈຸບັນ ລັດຖະບານໄດ້ມີການຜ່ອນຜັນໃນການປ້ອງກັນພະຍາດໂຄວິດ-19 ສະມາຄົມອຸດສາຫະກໍາຕັດຫຍິບລາວ ຕ້ອງການແຮງງານຫຼາຍກວ່າ 5,000 ຄົນ, ໃນຫຼາຍຕໍາແໜ່ງງານທີ່ຕ້ອງການ ເພື່ອແນໃສ່ເຮັດໃຫ້ບັນດາຜູ້ປະກອບການຕັດຫຍິບສາມາດດໍາເນີນກິດຈະການໄດ້.
