ຕາມຂ່າວຈາກ ຫວຽດນາມ,ວັນທີ8 ມິຖຸນານີ້, ກະຊວງ ການເງິນ ຫວຽດນາມ ພວມພິຈາລະນາ ປັບຫລຸດ ພາສີ ນ້ຳມັນ ເຊື້ອໄຟ ເພື່ອຫລຸດຜ່ອນ ບັນຫາ ລາຄາ ເພີ່ມສູງຂຶ້ນ ເປັນປະຫວັດສາດ ຂະນະທີ່ ອັດຕາ ເງິນເຟີ້ ຍັງຄວບຄຸມໄດ້ ແລະ ໄດ້ຮັບ ການຊ່ວຍເຫລືອ ຈາກຂະບວນຜະລິດ ສິນຄ້າ ພາຍໃນ ປະເທດ ຫລັງຈາກ ຫວຽດນາມ ພິຈາລະນາ ຫາແນວທາງ ປັບຫລຸດ ອັດຕາ ພາສີ ທຸກປະເພດ ຄິດເປັນ ປະມານ30% ຂອງລາຄາ ຄ້າຍ່ອຍ ລວມທັງ ພາສີ ນຳເຂົ້າ 80% ແລະ ພາສີ ມູນຄ່າເພີ່ມ 10%.ສຳລັບ ການປັບຫລຸດ ພາສີ ນ້ຳມັນ ເຊື້ອໄຟ ຈະຊ່ວຍຫລຸດ ລາຄາ ພະລັງງານ ລວມທັງ ຕົ້ນທຶນ ການຜະລິດ ແລະ ກະຕຸ້ນ ການເຕີບໂຕ ໃຫ້ກັບ ພາກທຸລະກິດ. ປັດຈຸບັນ ຫວຽດນາມ ພວມຜະເຊີນ ໜ້າກັບ ແຮງກົດດັນ ຈາກອັດຕາ ເງິນເຟີ້ ທີ່ເພີ່ມ ສູງຂຶ້ນ ເນື່ອງຈາກ ຕ້ອງອາໄສ ການນຳເຂົ້າ ນ້ຳມັນ ເຊື້ອໄຟ,ປຸ໋ຍ ແລະ ວັດຖຸດິບ ນຳເຂົ້າ ຈາກຕ່າງປະເທດ ຈຳນວນຫລາຍ. ສ່ວນຫວຽດນາມ ຕັ້ງເປົ້າໝາຍ ໃຫ້ເງິນເຟີ້ ຕ່ຳກວ່າ 4% ໃນປີນີ້.