ກະຊວງອຸດສາຫະກໍາ ແລະ ການຄ້າ ແລກປ່ຽນບົດຮຽນກັບ ບໍລິສັດການລົງທຶນຢາງພາລາຢຸນ 

ກະຊວງອຸດສາຫະກໍາ ແລະ ການຄ້າ ກັບ ບໍລິສັດ ການລົງທຶນຢາງພາລາ ຢຸນນານ ຈໍາກັດ ພົບປະແລກປ່ຽນບົດຮຽນ ຮ່ວມກັນ ວັນທີ 7 ມິຖຸນາ 2022 2022 ຢູ່ແຂວງຫລວງນໍ້າທາ ໂດຍການເປັນປະທານຮ່ວມຂອງ ທ່ານ ສໍາລີ ບຸດສະດີ ຮອງຫົວໜ້າ ກົມອຸດສາຫະກໍາການຄ້າແລະ ຫັດຖະກໍາ, ທ່ານ ຊີຕິງເຝີຍ ຮອງອໍານວຍການ ບໍລິສັດ ການລົງທຶນຢາງພາລາຢຸນນານ ຈໍາກັດ, ທ່ານ ຄໍາແກ້ວ ຈັນທະວົງ ຮອງຫົວໜ້າພະແນກອຸດສາຫະກໍາ ແລະ ການຄ້າແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ຊີຕິງເຝີຍ ໄດ້ໂດຍຫຍໍ້ກ່ຽວກັບ ການພັດທະນາຢາງພາລາຂອງ ບໍລິສັດການລົງທຶນຢາງພາລາຢຸນນານ ຈໍາກັດ ນັບແຕ່ປີ 2006 ເປັນຕົ້ນມາ ບໍລິສັດໄດ້ລົງທຶນທັງໝົດ 489 ລ້ານຢວນ, ໂຄງການຕັ້ງຢູ່ 4 ແຂວງ, ກວມ 9 ເມືອງ, ເນື້ອທີ່ 6000 ເຮັກຕາ, ໃນນີ້ໄດ້ແນະນໍາເຕັກນິກການປູກຢາງພາລາ ໃຫ້ແກ່ປະຊາຊົນຢູ່ບັນດາບ້ານຈໍານວນ 33.000 ເຮັກຕາ, ມີໂຮງງານຢາງພາລາ 3 ແຫ່ງ, ກໍາລັງສ້າງ 1 ແຫ່ງ ແລະສ້າງວຽກເຮັດງານທໍາໃຫ້ປະຊາຊົນ 6.000 ກວ່າຄົນ. ມາເຖິງປັດຈຸບັນ ໄດ້ເກັບຊື້ວັດຖຸດິບຢາງພາລາ ໃນທົ່ວປະເທດລາວກວມ 1/3 ຂອງຕະຫລາດວັດຖຸດິບຢາງພາລາ ໃນທົ່ວປະເທດລາວ.

ຈາກນັ້ນ, ກໍໄດ້ປືກສາຫາລືຫລາຍບັນຫາ ເປັນຕົ້ນ ກ່ຽວກັບການສົ່ງເສີມປະຊາຊົນປູກ ແລະ ຜະລິດຢາງພະລາໃຫ້ມີຈໍານວນເພີ່ມຂຶ້ນ ເພື່ອຕອບສະໜອງໃຫ້ແກ່ບໍລິສັດທີ່ເກັບຊື້ ແລະ ລົງທືນ, ປືກສາຫາລືໃນທິດທາງຕໍ່ໜ້າ ໂດຍບໍລິສັດຈະໄດ້ເພີ່ມທະວີຂະຫາຍຕະ ຫລາດເກັບຊື້ວັດຖຸດິບຢາງພາລາຢູ່ບັນດາແຂວງໃຫ້ໄດ້ 60 ພັນໂຕນຕໍ່ປີ. ນອກຈາກນີ້, ບໍລິສັດ ຍັງຈະໄດ້ສ້າງສູນວິໄຈຢາງພາລາ ຮ່ວມກັບກະຊວງກະສິກໍາແລະ ປ່າໄມ້ ເປັນສູນທີ່ກໍານົດມາດຕະຖານທາງດ້ານເຕັກນິກຢາງພາລາ ແລະ ກັກກັນພຶດກະສິກໍາ ແລະ ອື່ນໆ. ທັງນີ້, ກໍເພື່ອເປັນການສົ່ງເສີມການພັດທະນາ ອຸດສາຫະກໍາຢາງພາລາລາວ, ທັງເປັນການສ້າງວຽກເຮັດງານທໍາໃຫ້ແກ່ ປະຊາຊົນລາວບັນດາເຜົ່າໃຫ້ດີຂຶ້ນ.

ທິບພະຈັນ:ຮຽບຮຽງ