ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມດ້ວຍຄະນະ ໄດ້ສືບຕໍ່ເຄື່ອນໄຫວເຮັດວຽກ ແລະ ພົບປະໂອ້ລົມ ການນຳຫລັກແຫລ່ງແຂວງບໍ່ແກ້ວ ໂດຍໃຫ້ການຕ້ອນຮັບ ແລະ ເຂົ້າຮ່ວມຮັບຟັງການພົບປະໂອ້ລົມ ຂອງທ່ານ ບົວຄົງ ນາມມະວົງ ເຈົ້າແຂວງບໍ່ແກ້ວ ພ້ອມດ້ວຍພະນັກງານການນໍາຫລັກແຫລ່ງຂອງແຂວງ.
ທ່ານເຈົ້າແຂວງບໍ່ແກ້ວ ໄດ້ລາຍງານໃຫ້ຊາບກ່ຽວກັບທີ່ຕັ້ງ, ສະພາບຈຸດພິເສດ ແລະ ຂໍ້ຫຍຸ້ງຍາກ, ສິ່ງທ້າຍທາຍພາຍໃນແຂວງ, ການວາງຍຸດທະສາດໃນການພັດທະນາເສດຖະກິດ-ສັງຄົມຂອງແຂວງ ເປັນຕົ້ນ ສືບຕໍ່ຮັກສາສະຖຽນລະພາບທາງດ້ານການເມືອງ ໃຫ້ໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ ເພື່ອເອື້ອອຳນວຍໃຫ້ແກ່ການພັດທະນາວຽກງານຮອບດ້ານ; ພັດທະນາການຂົນສົ່ງໃຫ້ມີຄຸນນະພາບ ເພື່ອເຊື່ອມຕໍ່ບັນດາແຂວງພາກເໜືອຂອງລາວກັບປະເທດໃກ້ຄຽງ ແລະ ອະນຸພາກພື້ນ; ພັດທະນາການທ່ອງທ່ຽວທີ່ຍືນຍົງ; ຜະລິດສິນຄ້າກະສິກໍາສະອາດ ເພື່ອສະໜອງຄວາມຕ້ອງການຊົມໃຊ້ພາຍໃນ ແລະ ເປັນສິນຄ້າສົ່ງອອກ; ຊຸກຍູ້ສົ່ງເສີມການພັດທະນາເຂດເສດຖະກິດພິເສດສາມຫລ່ຽມຄຳ ໃຫ້ເປັນຫົວແມ່ເຫລັກດຶງເສດຖະກິດຂອງແຂວງ ໃຫ້ມີການຂະຫຍາຍ ຕົວ. ສຳລັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2022 ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ແມ່ນໄດ້ນຳເອົາກຳລັງປ້ອງກັນຊາດ-ປ້ອງກັນຄວາມສະຫງົບ ຫັນລົງກໍ່ສ້າງຮາກຖານການເມືອງ ແກ້ໄຂປະກົດການຫຍໍ້ທໍ້ໃນສັງຄົມ ຕິດພັນກັບວຽກງານສາມສ້າງ, ສ້າງຄອບຄົວແລະ ບ້ານປ້ອງກັນຄວາມສະຫງົບດີ; ເອົາໃຈໃສ່ຈັດຕັ້ງປະຕິບັດ ບັນດາໂຄງການລົງທຶນຂອງລັດ ຄຽງຄູ່ກັບການຍາດແຍ່ງການລົງທຶນ, ການປະກອບສ່ວນຈາກພາກສ່ວນຕ່າງໆດ້ວຍຫລາຍຮູບການ ເພື່ອສົ່ງເສີມການຜະລິດ ເຮັດໃຫ້ເສດຖະກິດຂອງແຂວງໄດ້ຮັບການພັດທະນາຖືກທິດ. ຄຽງຄູ່ກັນນັ້ນ ໄດ້ກະກຽມການສະເຫລີມສະຫລອງ ປີສາມັກຄີມິດຕະພາບລາວ-ຫວຽດນາມ ໂດຍແຕ່ງຕັ້ງຄະນະຮັບຜິດຊອບຊີ້ນໍາລວມ ແລະ ບັນດາອານຸກໍາມະການດ້ານຕ່າງໆ ເພື່ອດຳເນີນກະກຽມຄວາມພ້ອມຮອບດ້ານຢ່າງເປັນຂະບວນກວ້າງຂວາງ.
ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ໃຫ້ກຽດໂອ້ລົມ ແລະ ມີທິດຊີ້ນຳ ຕໍ່ອົງການປົກຄອງແຂວງບໍ່ແກ້ວ ເອົາໃຈໃສ່ຕື່ມບາງດ້ານເປັນຕົ້ນ ເພີ່ມທະວີສຶກສາອົບຮົມການເມືອງ-ແນວຄິດໃຫ້ພະນັກງານ ເພື່ອຍົກສູງສະຕິຄວາມຮັບຜິດຊອບໜ້າທີ່ການເມືອງຕ້ານປະກົດການທີ່ບໍ່ຖືກຕ້ອງ, ມີສະຕິຕໍ່ອິດທິກໍາລັງປໍລະປັກ ແລະ ຄົນທີ່ບໍ່ຫວັງດີຕໍ່ພັກ-ລັດ, ກໍາໄດ້ຫາງສຽງສັງຄົມ, ບໍລິໂພກຂໍ້ມູນຂ່າວສານຢ່າງມີສະຕິ ໂດຍສະເພາະ ຂໍ້ມູນຂ່າວ ສານຜ່ານສື່ອອນລາຍຕ່າງໆ; ສຸມໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ປີ 2022 ຂອງແຂວງ ຕິດພັນກັບການຈັດຕັ້ງປະຕິບັດວາລະແຫ່ງຊາດໃຫ້ເປັນຮູບປະທຳ; ໃຫ້ຖືເອົາວຽກງານ ການປະຕິບັດວຽກງານພັດທະນາຊົນນະບົດລຶບລ້າງຄວາມທຸກຍາກ ເປັນໜ້າທີ່ບຸລິມະສິດຂອງລັດຖະບານ, ຂະແໜງການ, ອົງການປົກຄອງທ້ອງຖິ່ນ ແລະ ໜ້າທີ່ຂອງທົ່ວປວງຊົນ ເຊິ່ງເຫັນວ່າແຂວງກໍໄດ້ມີຄວາມຮັບຜິດຊອບສູງ ແລະ ເອົາໃຈໃສ່ໃນການຄົ້ນຄວ້າ ແລະ ຊອກຫາທຸກວິທີແກ້ໄຂ ໂດຍໄດ້ຈັດສັນທຶນຮອນ ລວມທັງ ການຊຸກຍູ້-ປຸກລະດົມ ພາກສ່ວນທຸລະກິດຕ່າງໆ ທັງພາຍໃນ ແລະ ຕ່າງປະເທດ ເພື່ອສຸມເຂົ້າໃສ່ການພັດທະນາດ້ານຕ່າງໆ ຄຽງຄູ່ກັບການສ້າງຂະບວນການແຂ່ງຂັນຮັກຊາດ ແລະ ພັດທະນາ ຕິດພັນກັບການພັດທະນາຊົນນະບົດ ເພື່ອແກ້ໄຂຄວາມທຸກຍາກຂອງປະຊາຊົນ ເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ; ສືບຕໍ່ຜັນຂະຫຍາຍການຮ່ວມມືກັບບັນດາແຂວງພາກເໜືອ ກໍຄື ແຂວງແຮກສ່ຽວ ເຊີນລາ ເຊິ່ງຕ້ອງຖືເປັນວຽກບູລິມະສິດເພື່ອສ້າງໃຫ້ໄດ້ຄວາມໄວ້ເນື້ອເຊື່ອໃຈ; ຜັນຂະຫຍາຍການຕົກລົງຕ່າງໆຂອງການນໍາຂັ້ນສູງ 2 ປະເທດ ກໍຄື ການຕົກລົງຕ່າງໆຂອງການນໍາ 2 ແຂວງ ໃຫ້ເກີດດອກອອກຜົນຢ່າງຕັ້ງໜ້າ; ເປັນເຈົ້າການປັບປຸງປ່ຽນແປງປະຕິຮູບໃນແບບແຜນວິທີເຮັດວຽກທີ່ວ່ອງໄວ, ມີຄຸນນະພາບ, ມີແນວຄິດບຸກທະລຸອັນໃໝ່.
ໃນໂອກາດເຄື່ອນໄຫວເຮັດວຽກຢູ່ແຂວງ ບໍ່ແກ້ວ ທ່ານຮອງນາຍົກລັດຖະມົນຕີ ພ້ອມດ້ວຍຄະນະຍັງໄດ້ຮ່ວມກິດຈະກໍາປູກຕົ້ນໄມ້ ຢູ່ເຂດກໍ່ສ້າງພະພຸດທະບາລະມີສີບໍ່ແກ້ວ (106) ເນື່ອງໃນວັນປູກຕົ້ນໄມ້ແຫ່ງຊາດ ວັນທີ 1 ມິຖຸນາ ຄົບຮອບ 42 ປີຕື່ມອີກ.
ທິບພະຈັນ:ຮຽບຮຽງ