ສະພາບການຕິດເຊື້ອພະຍາດໂຄວິດ-19 ຢູ່ລາວ ປັດຈຸບັນ ແມ່ນມີທ່າອ່ຽງຫຼຸດລົງ, ຕິດເຊື້ອໃໝ່ໃນມື້ນີ້ 94 ຄົນ ແລະ ບໍ່ມີຜູ້ເສຍຊີວິດໃໝ່, ສ່ວນໜຶ່ງເປັນຍ້ອນອັດຕາການສັກວັກຊີນກຸ່ມປະຊາກອນເຂັມ 1 ບັນລຸເກືອບ 80%
ດຣ ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ຕາງໜ້າຄະນະສະເພາະກິດ ຖະແຫຼງຂ່າວກ່ຽວກັບສະພາບການລະບາດຂອງພະຍາດໂຄວິດ-19 ປະຈຳວັນທີ 12 ພຶດສະພາ 2022 ວ່າ: ວັນທີ 11 ພຶດສະພາ ໄດ້ກວດວິເຄາະທັງໝົດ 981 ຕົວຢ່າງ ແລະ ພົບຜູ້ຕິດເຊື້ອໃໝ່ 94 ຄົນ ຕິດເຊື້ອພາຍໃນ 92 ຄົນ ຈາກ ນວ 56 ຄົນ, ແຂວງວຽງຈັນ 11 ຄົນ, ຄຳມ່ວນ 6 ຄົນ, ອຸດົມໄຊ 5 ຄົນ, ຫຼວງພະບາງ 4 ຄົນ, ຊຽງຂວາງ 3 ຄົນ, ໄຊສົມບູນ 2 ຄົນ, ສະຫວັນນະເຂດ, ຈຳປາສັກ, ສາລະວັນ, ຜົ້ງສາລີ ແລະ ໄຊຍະບູລີ ແຂວງລະ 1 ຄົນ. ນອກນີ້ ຍັງມີຜູ້ຕິດເຊື້ອຈາກການເດີນທາງເຂົ້າປະເທດ 2 ຄົນ ຈາກ ສະຫວັນນະເຂດ ເຮັດໃຫ້ຕົວເລກຜູ້ຕິດເຊື້ອສະສົມ 209.243 ຄົນ ແລະ ບໍ່ລາຍງານຜູ້ເສຍຊີວິດໃໝ່
ພ້ອມນີ້ ທ່ານຮອງຫົວໜ້າກົມຄວບຄຸມພະຍາດຕິຕໍ່ ຍັງເວົ້າຕື່ມວ່າ: ສະພາບການລະບາດຂອງພະ ຍາດໂຄວິດ ຢູ່ປະເທດລາວ ມີທ່າອ່ຽງທີ່ດີຂຶ້ນ ແລະ ກຳລັງຢູ່ໃນໄລຍະຂາລົງ. ສະນັ້ນ ເພື່ອຮັບມືກັບການເປີດປະເທດ, ທຸກຄົນຕ້ອງໄດ້ກະກຽມຕົນເອງ ໃນການດຳລົງຊີວິດປົກກະຕິແບບໃໝ່ New Normal ໃຫ້ກາຍເປັນຄວາມຊິນເຄີຍ ແລະ ເຮັດເປັນປະຈຳ. ສິ່ງສຳຄັນແມ່ນ ທຸກຄົນຈຳເປັນຕ້ອງໄດ້ຮັບການສັກວັກຊີນໃຫ້ຄົບທຸກເຂັມທີ່ແນະນຳ ເພື່ອສ້າງພູມຄຸ້ມກັນໃຫ້ແກ່ຕົນເອງ ແລະ ເຊິ່ງຫຼ້າສຸດຕົວເລກຂອງການສັກວັກຊີນເຂັມ 1 ທົ່ວປະເທດ ກວມ 78,92%, ທຸກເຂັມທີ່ແນະນໍາ ກວມ 67,83% ແລະ ເຂັມກະຕຸ້ນ ກວມເອົາ 20,1%.
ຂ່າວ:ເບັງ