ເນື່ອງໃນວັນກາແດງ ແລະ ຊີກວົງເດືອນແດງສາກົນ 8 ພຶດສະພາ ທີ່ຈະມາເຖິງນີ້ ທ່ານປະທານອົງການກາແດງແຫ່ງຊາດລາວ ຈຶ່ງໄດ້ມີຖະແຫຼງຂ່າວ ແລະ ໃນການສະເຫຼີມສະຫຼອງປີນີ້ ພາຍໃຕ້ຫົວຂໍ້: ພວກເຮົາທຸກຄົນມີຄວາມເມດຕາຕໍ່ເພື່ອນມະນຸດດ້ວຍກັນ.
ຮສ. ດຣ ພູທອນ ເມືອງປາກ ປະທານອົງການກາແດງແຫ່ງຊາດລາວ ໄດ້ຖະແຫຼງຂ່າວກ່າວກັບວັນກາແດງ ແລະ ຊີກວົງເດືອນແດງສາກົນ ໃນວັນທີ 5 ພຶດສະພາ 2022 ວ່າ: ໃນໄລຍະ 1 ສະຕະວັດທີ່ຜ່ານມາ ນັບແຕ່ການລິເລີ່ມຂອງ ທ່ານ ຮັງຣີ ດຸຍນັງ ຜູ້ກໍ່ຕັ້ງ ສະມາຄົມບັນເທົາທຸກແບບສະໝັກໃຈ ຊື່ງໄດ້ນຳໄປສູ່ການສ້າງຕັ້ງ ຄະນະກຳມະການກາແດງສາກົນ, ໄດ້ມີການສ້າງຕັ້ງອົງການກາແດງແຫ່ງຊາດຂຶ້ນ ໃນບັນດາປະເທດຕ່າງໆ ແລະ ໃນວັນທີ 5 ພຶດສະພາ 1919 ສະຫະພັນກາແດງ ແລະ ຊີກວົງເດືອນແດງສາກົນ ກໍໄດ້ຮັບການສ້າງຕັ້ງຂຶ້ນ (IFRC) ແລະ ມາຮອດປັດຈຸບັນທົ່ວໂລກໄດ້ມີ ສະພາກາແດງ ແລະ ຊີກວົງເດືອນແດງແຫ່ງຊາດ 192 ປະເທດ, ໂດຍນຳໃຊ້ກາກະບາດສີແດງ ເທິງພື້ນສີຂາວ ຫຼື ຊີກວົງເດືອນແດງ ເທິງພື້ນສີຂາວ ເປັນເຄື່ອງໝາຍເພື່ອປົກປ້ອງ ແລະ ການຊ່ວຍເຫຼືອບັນເທົາທຸກ ໃນເວລາທີ່ເກີດມີຂໍ້ຂັດແຍ່ງລະຫວ່າງປະເທດ ຫຼື ພາຍໃນປະເທດ ທີ່ໄດ້ລະບຸໄວ້ໃນສົນທິສັນຍາເຊີແນວ ແລະ ອະນຸສັນຍາເພີ່ມເຕີມ ເພື່ອແກ້ໄຂບັນຫາ ໃນເວລາມີຂໍ້ຂັດແຍ່ງ ຫຼື ປະທະກັນ, ສປປລາວ ກໍໄດ້ເລີ່ມມີການຈັດຕັ້ງປະຕິບັດ ນັບແຕ່ມື້ສ້າງຕັ້ງ ວັນທີ 1 ມັງກອນ 1955, ຖືກຮັບຮູ້ຈາກ ຄະນະກຳມະການກາແດງສາກົນ ໃນວັນທີ 23 ພຶດສະພາ 1957 ແລະ ເຂົ້າເປັນສະມາ ຊິກຂອງສະຫະພັນກາແດງ ແລະ ຊີກວົງເດືອນແດງສາກົນ ໃນວັນທີ 25 ຕຸລາ 1957 ໂດຍກອງປະຊຸມໃຫຍ່ ຄັ້ງທີ 24 ຂອງບັນດາອົງການກາແດງ ແລະ ຊີກວົງເດືອນແດງສາກົນ ຢູ່ນິວແດນລີ ປະເທດອິນເດຍ.
ພາຍຫຼັງທີ່ ສປປລາວ ເຂົ້າເປັນສະມາຊິກອົງກາແດງ ແລະ ຊີກວົງເດືອນແດງສາກົນ, ກໍໄດ້ເຄື່ອນໄຫວວຽກງານມະນຸດສະທຳ ໃນ 7 ຫຼັກການພື້ນຖານ ແລະ 9 ວຽກງານສຳຄັນ ຕາມພາລະບົດບາດເພື່ອຊ່ວຍເຫຼືອສັງຄົມ, ນອກນັ້ນ ຍັງໄດ້ຂະຫຍາຍເຄື່ອຂ່າຍ, ຂະຫຍາຍສາຂາຂອງອົງການກາແດງແຫ່ງຊາດລາວ ໄປທົ່ວທຸກແຂວງໃນຂອບເຂດທົ່ວປະ ເທດ ແລະ ການລະນຶກເຖິງວັນດັ່ງກ່າວ ປີນີ້ ທາງຄະນະກຳມະການກາແດງ ແລະ ຊີກວົງເດືອນແດງສາກົນ ໄດ້ຍົກເອົາການສະແດງຮູບພາບຄວາມເມດຕາຕໍ່ເພື່ອນມະນຸດ ແລະ ປຸກລະດົມໃຫ້ກຳລັງໃຈ ໃຫ້ທຸກຄົນໃນທົ່ວໂລກ ມີນໍ້າໃຈເມດຕາ ຕໍ່ເພື່ອນມະນຸດດ້ວຍກັນ ພາຍໃຕ້ຄຳຂວັນທີ່ວ່າ: ພວກເຮົາທຸກຄົນມີຄວາມເມດຕາຕໍ່ເພື່ອນມະນຸດດ້ວຍກັນ.
ຂ່າວ: ຈັນດອນ
ພາບ: ແສງອາລຸນ