ໃນການສອບເສັງນັກຮຽນເກັ່ງ ຂັ້ນ ປ 5, ມ 4 ແລະ ມ 7 ປະຈຳສົກຮຽນ 2021-2022 ທົ່ວ ນວ ມີນ້ອງນັກຮຽນເຂົ້າຮ່ວມທັງໝົດ 533 ນ້ອງ ຍິງ 366 ນ້ອງ.
ເພື່ອເປັນການຊຸກຍູ້ຂະບວນການຮຽນ-ການສອນ ຂອງຄູອາຈານ ແລະ ນ້ອງນັກຮຽນໃຫ້ມີຄວາມຫ້າວຫັນ, ຮັບ ປະກັນໃນການປະຕິບັດໂຄງການຫຼັກສູດໃຫ້ສຳເລັດຕາມລະດັບຄາດໝາຍ, ທັງເປັນການສ້າງໂອກາດແກ່ນັກຮຽນທີ່ມີພອນສະຫວັນໄດ້ສະແດງຄວາມຮູ້ ຄວາມສາມາດ ແລະ ຫົວຄິດປະດິດສ້າງ ໃນສາຂາວິຊາຫຼັກ ແລະ ເພື່ອເປັນການຍ້ອງ ຍໍ ຊົມເຊີຍຜູ້ສອບເສັງນັກຮຽນເກັ່ງທີ່ໄດ້ຄະແນນສູງສຸດ ທີ່ຈະໄດ້ເປັນຕົວແທນຂອງ ນວ ເຂົ້າຮ່ວມການສອບເສັງລະດັບຊາດ, ດັ່ງນັ້ນ ວັນທີ 21 ເມສາ 2022 ທີ່ໂຮງຮຽນ ມສ ວຽງຈັນ ຈຶ່ງໄດ້ມີພິທີຫຼູບການສອບເສັງແຂ່ງຂັນນັກຮຽນເກັ່ງ ຂັ້ນ ປ 5. ມ4 ແລະ ມ7 ຂຶ້ນ ໂດຍການເຂົ້າຮ່ວມຂອງທ່ານ ອາດສະພັງທອງ ສີພັນດອນ ເຈົ້າຄອງ ນວ, ມີທ່ານ ສົມພອນ ສອນດາລາ ຫົວໜ້າພະແນກ ສສກ ນວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານຫົວໜ້າພະແນກ ສສກ ນວ ໄດ້ຂຶ້ນຜ່ານບົດສະຫຼຸບການແຂ່ງຂັນສອບເສັງນັກຮຽນເກັ່ງທົ່ວ ນວ ຂັ້ນ ປ5, ມ4 ແລະ ມ7 ປະຈຳສົກຮຽນ 2021-2022 ວ່າ: ການສອບເສັງໄດ້ຄັດເລືອກເອົາຈາກນັກສອບເສັງທີ່ເປັນຕົວແທນ 9 ເມືອງ ວິຊາລະ 5 ຄົນ, ໃນນັ້ນ ຊັ້ນປ 5 ມີ 3 ວິຊາ ນັກສອບເສັງ 533 ຄົນ ຍິງ 366 ຄົນ. ຊັ້ນ ມ4 ແລະ ມ7 ເສັງ 4 ວິຊາ, ໃນນີ້ ມ4 ນັກສອບເສັງ 197 ຄົນ ຍິງ 136 ຄົນ ແລະ ມ7 ມີ 202 ຄົນ ຍິງ 136 ຄົນ, ໃນຈຳນວນຜູ້ສອບເສັງດັ່ງກ່າວ ຊະນະເລີດອັນດັບ 1 ມີ 11 ນ້ອງ ຍິງ 5 ນ້ອງ. ປ5 ມີນາງ ຄານຕາວັນ ມິດສຳພັນ ຈາກໂຮງຮຽນປະຖົມຊະນະພົນ ເມືອງ ສີໂຄດຕະບອງ ແມ່ນວິຊາພາສາລາວ, ສ່ວນວິຊາຄະນິດສາດ ແມ່ນນາງ ອິນທິດາ ໄຊຍະສຸກ ຈາກໂຮງຮຽນປະຖົມສິນໄຊ ເມືອງຈັນທະບູລີ ແລະ ວິຊາໂລກອ້ອມຕົວ ແມ່ນນາງ ມິນຕາ ເມືອງປາກ ຈາກໂຮງຮຽນປະຖົມປາດຖະໜາ ເມືອງໄຊເສດຖາ. ສຳລັບຊັ້ນ ມ4 ມີ 4 ນ້ອງຄື: ນາງ ຕາວັນ ວົງວິໄລ ໃນວິຊາພາສາລາວ-ວັນນະຄະດີ ແລະ ທ້າວ ເພັດນະຄອນ ພົນທະຈັກ ວິຊາຄະນິດສາດ ຈາກ ມ.ສ ປາດຖະໜາ ເມືອງໄຊເສດຖາ. ຟີຊິກສາດ ແມ່ນທ້າວ ອຸດົມຄຳ ບຸນວິໄລ ແລະ ວິຊາເຄມີສາດ ແມ່ນທ້າວ ວຽງພະຈັນ ມະນີວົງ ມາຈາກ ມ.ສ ພອນສະຫວັນຊົນເຜົ່າ ເມືອງໄຊທານີ, ຊັ້ນ ມ7 ມີ 4 ນ້ອງຄື: ວິຊາພາສາລາວ-ວັນນະຄະດີ ແມ່ນນາງ ພອນໄພລັກ ໄຊຊະນະ ຈາກ ມ.ສ ວິຣະຖາວອນ ເມືອງສີສັດຕະນາກ, ວິຊາຟີຊິກສາດ ແມ່ນທ້າວ ລີປໍຢ່າງ ເຍ່ຍກົວ ຈາກ ມ.ສ ວຽງຈັນ ເມືອງຈັນທະບູລີ, ສຳລັບວິຊາເຄມີສາດ ແມ່ນທ້າວ ທົງທໍ່ ໄຊກົວ ຈາກ ມ.ສ ພອນສະຫວັນຊົນເຜົ່າ ເມືອງໄຊທານີ ແລະ ວິຊາຄະນິດສາດ ແມ່ນທ້າວ ເຕລີ ລໍເບຼຍຢາວ ຈາກ ມ.ສ ພອນສະຫວັນຊົນເຜົ່າ ເມືອງຫາດຊາຍຟອງ. ສ່ວນອັນດັບ 2 ມີ 13 ນ້ອງ ເປັນຍິງ 7 ນ້ອງ ແລະ ອັນດັບ 3 ມີ 12 ນ້ອງ ຍິງ 7 ນ້ອງ, ເຊິ່ງໃຫ້ກຽດຂຶ້ນມອບໃບຍ້ອງຍໍໃຫ້ກັບນັກຮຽນເກັ່ງອັບດັບ 1 ໂດຍ ທ່ານ ອາດສະພັງທອງສີພັງດອນ.
ໂອກາດດຽວກັນນັ້ນ ບໍລິສັດ ນ້ຳດື່ມຫົວເສືອ ກໍໄດ້ມອບເງິນອຸປະຖຳການສອບເສັງນັກຮຽນເກັ່ງສາຍສາມັນສຶກສາ ມູນຄ່າ 58 ກວ່າລ້ານກີບ, ຕາງໜ້າບໍລິສັດມອບແມ່ນທ່ານ ແຊດ ຄຳນົນ ແລະ ຮັບໂດຍພະແນກ ສຶກສາທິການ ແລະ ກີລາ ນວ, ຈາກນັ້ນ ພະແນກ ຍັງໄດ້ມອບໃບຍ້ອງຍໍໃຫ້ແກ່ຄູອາຈານ ໃນແຕ່ລະໂຮງຮຽນທີ່ສອນດີສອນເດັ່ນ ພ້ອມທັງ ມອບໃບຍ້ອງຍໍໃຫ້ນ້ອງນັກຮຽນທີ່ສອບເສັງຕິດອັນດັບ 2, 3 ແລະ ມອບລາງວັນຊົນເຊີຍໃຫ້ແກ່ຜູ້ທີ່ໄດ້ເຂົ້າຮ່ວມສອບເສັງອີກດ້ວຍ.
ຂ່າວ: ເບັງ
ພາບ: ວິໄລສັກ