ປະທານອົງການກາແດງແຫ່ງຊາດລາວ ລົງເຄື່ອນໄຫວຢ້ຽມຢາມປະຊາຊົນ 4 ບ້ານໂຄງການຂອງເມືອງບົວລະພາ ພ້ອມມອບອຸປະກອນເຕືອນໄພ ໃຫ້ 4 ບ້ານເປົ້າໝາຍ ແລະ ເຄື່ອງຊ່ວຍເຫຼືອນ້ອງນັກຮຽນຈຳນວນໜຶ່ງ ມູນຄ່າ 79 ລ້ານກວ່າກີບ
ໃນວັນທີ 28 ມີນາ 2022 ຮສ ດຮ ພູທອນ ເມືອງປາກ ປະທານອົງການກາແດງແຫ່ງຊາດລາວ ພ້ອມດ້ວຍຄະນະ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ປະຊາຊົນຢູ່ 4 ບ້ານ ໃນໂຄງການຫຼຸດຜ່ອນຄວາມສ່ຽງໄພພິບັດໃນຊຸມຊົນ ຂອງອົງການກາແດງແຫ່ງຊາດລາວ.
ການລົງຕິດຕາມຄັ້ງນີ້ ປະທານອົງການກາແດງລາວ ໄດ້ມອບອຸປະກອນເຕືອນໄພໃຫ້ 4 ບ້ານເປົ້າໝາຍຂອງໂຄງ ການ ໃນເມືອງບົວລະພາ ຄື: ບ້ານສະອາງ ໄດ້ຮັບເຮືອໄມ້ 1 ລຳ, ເສື້ອຊູຊີບ 20 ຜືນ, ໂທລະໂຄ່ງມືຖື 2 ໜ່ວຍ, ບ້ານຫຍ້າຫວາຍ ໄດ້ຮັບແອັມ 350 ວັດ 1 ເຄື່ອງ, ໄມໂຄໂຟນ 1 ອັນ, ໂທລະໂຄ່ງ 3 ໜ່ວຍ, ໝໍ້ແບ່ງລາຍ 3 ໜ່ວຍ ແລະ ສາຍໂທລະໂຄ່ງ 200 ແມັດ 1 ກໍ້, ສຳລັບ ບ້ານຂະຍູ້ ໄດ້ຮັບເຮືອໄມ້ 1 ລຳ, ເສື້ອຊູຊີບ 20 ຜືນ, ໂທລະໂຄ່ງມືຖື 2 ຫນ່ວຍ ແລະ ບ້ານຜານົບ ແມ່ນໄດ້ເທພື້ນເບຕົງເສີມເຫຼັກ ທາງຂຶ້ນບ້ານ ເຊິ່ງມີຄວາມຍາວ 40 ແມັດ, ລວງກ້ວາງ 2,80 ແມັດ, ຄວາມຫນາ 10 ຊັງຕີແມັດ, ລວມມູນຄ່າ 39 ລ້ານກວ່າກີບ, ມີປະຊາຊົນຫຼາຍກວ່າ 2 ພັນຄົນ ທີ່ໄດ້ຊົມໃຊ້ ແລະ ໄດ້ຮັບຜົນປະໂຫຍດຈາກໂຄງການນີ້, ໂດຍການສະໜັບສະໜູນຈາກ ສະມາຄົມ ພັດທະນາບົດບາດຍິງ-ຊາຍ ເຄືອຂ່າຍອົງການຈັດຕັ້ງທາງສັງຄົມສາກົນ ເພື່ອຫຼຸດຜ່ອນໄພພິບັດ ຂອງປະເທດອັງກິດ
ຕາງໜ້າມອບໃນຄັ້ງນີ້ໂດຍ ຮສດຮ ພູທອນ ເມືອງປາກ ແລະ ຕາງໜ້າຮັບໂດຍ ອົງການປົກຄອງຂອງ 4 ບ້ານ, ໃນໂອກາດດັ່ງກ່າວນີ້ ທ່ານປະທານອົງການກາແດງແຫ່ງຊາດລາວ ກໍ່ໄດ້ສະແດງຄວາມຍ້ອງຍໍຊົມເຊີຍຜົນສຳເລັດໃນການຈັດຕັ້ງປະຕິບັດໂຄງການ ພ້ອມທັງເນັ້ນໃຫ້ພະນັກງານ ແລະ ອາສາສະໝັກ ເອົາໃຈໃສ່ປະຕິບັດໜ້າທີ່ຕາມການມອບໝາຍ, ອົງການປົກຄອງທ້ອງຖິ່ນແຕ່ລະຂັ້ນໃຫ້ເປັນເຈົ້າການໃນການຕິດຕາມ-ຊຸກຍູ້ຮັກສາວັດຖຸອຸປະກອນນຳໃຊ້ຢ່າງປະສິດທິພາບ ແລະ ຍືນຍົງ, ປຸກລະດົມສັງຄົມໃຫ້ປະກອບສ່ວນໃນວຽກງານກາແດງໃຫ້ນັບມື້ນັບເພີ່ມຂຶ້ນ.
ນອກນີ້ ປະທານອົງການກາແດງແຫ່ງຊາດລາວ ຍັງໄດ້ນຳເຄື່ອງເຄື່ອງຈຳນວນໜຶ່ງ ມາມອບໃຫ້ນ້ອງນັກຮຽນ ໂຮງຮຽນມັດທະຍົມສຶກສາສົມບູນ ບ້ານສະອາງ ເມືອງບົວລະພາ ແຂວງຄຳມ່ວນ, ໃນມູນຄ່າ 40 ລ້ານກວ່າກີບ ທີ່ໄດ້ຮັບການສະໜັບສະໜູນຈາກກາແດງ ສ.ເກົາຫຼີ, ເພື່ອເປັນການປະກອບສ່ວນແກ່ນ້ອງນັກຮຽນໄດ້ມີອຸປະກອນການຮຽນ ແລະ ເຄື່ອງນຸ່ງຫົ່ມທີ່ຮັບໃຊ້ໃນການສຶກສາຄົ້ນຄວ້າຮ່ຳຮຽນ.
ຂ່າວ-ພາບ: ເບັງ