ປກສ ແຂວງ ຮ່າຕິງ ເຂົ້າອວຍພອນກອງບັນຊາການ ປກສ ແຂວງຄໍາມ່ວນ

ກອງບັນຊາການ ປກສ ແຂວງ ຮ່າຕິງ ເຂົ້າອວຍພອນກອງບັນຊາການ ປກສ ແຂວງຄໍາມ່ວນເນື່ອງໃນໂອກາດ ວັນສ້າງຕັ້ງກຳລັງປ້ອງກັນຄວາມສະຫງົບຄົບຮອບ 61 ປີ ແລະ ໃນໂອກາດປີໃໝ່ລາວ ພສ 2565.

ໃນວັນທີ 05 ເມສາ 2022 ຢູ່ທີກອງບັນຊາການ ປກສ ແຂວງຄໍາມ່ວນ ຄະນະພັກ – ຄະນະບັນຊາ ກອງບັນ ຊາການ ປກສ ແຂວງຮ່າຕິງ ສສ ຫວຽດນາມ ເຊິ່ງນຳໂດຍທ່ານ ພັນເອກ ເລວັນຮວາ ຄະນະປະຈຳພັກແຂວງ ຫົວໜ້າ ກອງບັນຊາການ ປກສ ແຂວງຮ່າຕິງ ສສ ຫວຽດນາມ ພ້ອມດ້ວຍຄະນະ ໄດ້ນຳເອົາກະຕ່າຂອງຂວັນເຂົ້າອວຍພອນ ຄະນະພັກ ຄະນະກອງບັນຊາການປ້ອງກັນຄວາມສະຫງົບ ແຂວງຄຳມ່ວນ ເນື່ອງໃນໂອກາດວັນສ້າງຕັ້ງກຳລັງປ້ອງກັນຄວາມສະ ຫງົບ ຄົບຮອບ 61 ປີ ( 5 ເມສາ 1961 – 5 ເມສາ 2022 ) ແລະ ປີໃຫມ່ລາວ ໂດຍການຕ້ອນຮັບຂອງ ທ່ານ ພັນເອກ ທິບພະຈັນ ໂພໄຊ ຫົວໜ້າກອງບັນຊາການ ປກສ ແຂວງຄຳມ່ວນ ພ້ອມດ້ວຍຄະນະ.

ໂອກາດດັ່ງກ່າວນີ້ທ່ານ ພັນເອກ ເລວັນຮວາ ຄະນະປະຈຳພັກແຂວງ ກໍ່ໄດ້ຕາງໜ້າໃຫ້ຄະນະພັກ -ຄະນະບັນຊາ, ພະນັກງານນັກຮົບ ທົ່ວກໍາລັງ ປກສ ແຂວງຮ່າຕິງກ່າວສະແດງຄໍາອວຍພອນໄຊອັນປະເສີດ ມາຍັງຄະນະພັກ-ຄະນະບັນຊາຂອງກໍາລັງປ້ອງກັນຄວາມສະຫງົບທົ່ວແຂວງຄຳມ່ວນ ຈົ່ງມີສຸຂະພາບແຂງແຮງ, ມີພະລານາໄມສົມບູນ, ມີຜົນສໍາເລັດໃນໜ້າທີ່ວຽກງານທີ່ພັກ-ລັດ ກໍ່ຄືການຈັດຕັ້ງຂັ້ນເທິງມອບໝາຍໃຫ້.

ໃນໂອກາດທີ່ມີຄວາມໝາຍຄວາມສຳຄັນນີ້ ທ່ານ ພັນເອກ ທິບພະຈັນ ໂພໄຊ ກໍ່ໄດ້ກ່າວສະແດງຄວາມຂອບອົກຂອບໃຈຕໍ່ການເຂົ້າມາອວຍພອນຂອງ ຄະນະພັກ-ຄະນະບັນຊາກອງບັນຊາການປກສ ແຂວງຮ່າຕິງ ໃນຄັ້ງນີ້ ແມ່ນເປັນການເພີ່ມພູນຄູນສ້າງ, ຮັດແໜ້ນຄວາມສາມັກຄີ ລະຫວ່າງ 2 ກໍາລັງ ແລະ ພ້ອມກັນປົກປັກຮັກສາ ລຽບຕາມຊາຍແດນທັງສອງແຂວງໃຫ້ມີຄວາມສະຫງົບໂດຍພື້ນຖານ.

ຂ່າວ: ປກສ ແຂວງຄຳມ່ວນ

ບກ: ຮຽບຮຽງ