ເພື່ອໃຫ້ນັກສຶກສາ, ຜູ້ວ່າງງານ, ຜູ້ຊອກວຽກ, ແຮງງານທີ່ກັບມາແຕ່ຕ່າງປະເທດໃນຂອບເຂດທົ່ວປະ ເທດໃຫ້ໄດ້ຮັບຂໍ້ມູນຂ່າວສານ ແລະ ມີໂອກາດຊອກຫາວຽກເຮັດງານທຳ, ດັ່ງນັ້ນ 4 ພາກສ່ວນຈຶ່ງໄດ້ພ້ອມກັນຈັດງານມະຫະກຳສົ່ງເສີມແຮງງານລາວ ຂຶ້ນໃນວັນທີ 16 ມີນາ 2022, ທີ່ສູນການຄ້າວຽງຈັນເຊັນເຕີ.
ເຂົ້າຮ່ວມເປັນປະທານ ແລະ ກົດປຸ່ມໄຂງານມະຫາກຳສົ່ງເສີມແຮງງານໂດຍ ສຈ ປອ ກິແກ້ວ ໄຂຄໍາພິທູນ ຮອງນາຍົກລັດຖະມົນຕີ, ມີທ່ານນາງ ໃບຄຳ ຂັດຕິຍະ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ປອ ຮສ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກີລາ, ທ່ານນາງ ອາລີ ວົງໜໍ່ບຸທຳ ປະທານສູນກາງສະຫະພັນກຳມະບານລາວ, ທ່ານ ດາວວອນ ພະຈັນທະວົງ ຮອງປະທານປະຈຳການ ສະພາການຄ້າ ແລະ ອຸດສາຫະກໍາແຫ່ງຊາດລາວ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ດາວວອນ ພະຈັນທະວົງ ກ່າວວ່າ: ການມີວຽກເຮັດງານທຳຂອງກຳລັງແຮງງານໃນອະນາຄົດ ແມ່ນພາລະ ກິດຂອງທຸກພາກສ່ວນຕ້ອງໄດ້ມີສ່ວນຮ່ວມ, ດັ່ງນັ້ນ ງານມະຫະກໍາສົ່ງເສີມແຮງານລາວ ທີ່ເລີ່ມແຕ່ວັນທີ 16-20 ມີນາ 2022 ກໍເປັນອີກງານໜຶ່ງ ທີ່ເກີດຂຶ້ນໄດ້ດ້ວຍການມີສ່ວນຮ່ວມຂອງທຸກພາກສ່ວນ ເພື່ອໃຫ້ນັກສຶກສາທີ່ຈົບໃໝ່, ຜູ້ວ່າງງານ, ຜູ້ຊອກວຽກ, ແຮງງານເຄື່ອນຍ້າຍທີ່ກັບມາແຕ່ຕ່າງປະເທດໃນຂອບເຂດທົ່ວປະເທດ ໄດ້ຮັບຂໍ້ມູນຂ່າວສານ ແລະ ມີໂອກາດຊອກຫາວຽກເຮັດງານທຳ, ລວມທັງ ຜູ້ປະກອບການໄດ້ແຮງງານທີ່ມີຄຸນນະພາບເຂົ້າບັນຈຸໃນຂະແໜງ ການ, ສິ່ງສຳຄັນພາຍໃນງານປີນີ້ ຈະມີຄະນະນໍາຂັ້ນຮອງລັດຖະມົນຕີ ເຂົ້າຮ່ວມເວທີສົນທະນາ ເພື່ອໃຫ້ເຫັນສິ່ງທີ່ປັບປຸງ, ປ່ຽນແປງ ແລະ ພັດທະນາຮ່ວມກັນ ໃນຫົວຂໍ້ “ການຟື້ນຟູນະໂຍບາຍດ້ານຕະຫຼາດແຮງງານ ແລະ ການພັດທະນາຊັບ ພະຍາກອນມະນຸດ ຢູ່ລາວ”, ເວທີສົນທະນາຈາກເຈົ້າຂອງທຸລະກິດຫຼາຍຂະແໜງການ ທັງພາກລັດ, ອົງການຈັດຕັ້ງສາ ກົນ ແລະ ເອກະຊົນ ຈະມາໃຫ້ຄວາມຮູ້ໃນຫຼາຍຫົວຂໍ້ ໂດຍສະ ເພາະແມ່ນ ການໃຫ້ຄວາມຮູ້ດ້ານນິຕິກໍາຕິດພັນ ເພື່ອປົກປ້ອງແຮງງານ ການນໍາສະເໜີຄວາມຕ້ອງການແຮງງານ ຕໍ່ກັບການພັດທະນາຊັບພະຍາກອນມະນຸດ ຄວາມຕ້ອງການພັດທະນາແຮງງານໃນຂະແໜງກະສິກໍາ, ການບໍລິການ, ເສດຖະ ກິດພິເສດ ແລະ ອຸດສາຫະກໍາ ໃຫ້ເປັນບາດກ້າວໃໝ່ໃນການເລີ່ມຕົ້ນຮ່ວມສ້າງແຜນນະໂຍບາຍ ແຜນນໍາໃຊ້ລະຫວ່າງຜູ້ສ້າງ, ຜູ້ໃຊ້ແຮງງານ, ຜູ້ປົກປ້ອງ ແລະ ຄູ່ຮ່ວມພັດທະນາໃຫ້ມີຄວາມສອດຄ່ອງ ເພື່ອຫຼຸດຊ່ອງວ່າງບັນຫາ ແລະ ສະພາບການແຮງງານເຫຼືອບໍ່ພໍ, ຂາດແຮງງານທີ່ມີສີມື, ພັດທະນາບໍ່ແທດເໝາະກັບຄວາມຕ້ອງການແຮງງານ.
ພາຍໃນງານ ບັນດາບຸດທີ່ຮ່ວມວາງສະແດງ 68 ບູດຈາກ 65 ຂະແໜງທຸລະກິດຕ່າງໆ ຍັງຈະໄດ້ເກັບກໍາຂໍ້ມູນຄວາມຕ້ອງການແຮງງານຈາກບໍລິສັດ, ຕໍາແໜ່ງວ່າງ, ສະເໜີທຶນການສຶກສາ ການທົດສອບສີມືແຮງງານ, ການສາທິດ ແລະ ການແຂ່ງຂັນສີມືຂະແໜງລົດຍົນ, ບໍລິການ, ອຸດສະກໍາປຸ່ງແຕ່ງໄມ້ ເພື່ອຊິງທຶນການສຶກສາ ແລະ ການບັນຈຸເຂົ້າເຮັດວຽກ, ລວມທັງ ກິດຈະກຳສາທິດຈາກໂຮງຮຽນວິຊາຊີບຕ່າງໆ ຕະຫຼອດໄລຍະ 5 ວັນຂອງການຈັດງານຕື່ມອີກ.
ຂ່າວ: ເບັງ ພາບ: ວິໄລສັກ