ພັທ ທັດສະພົງ ຫວັນມະນີຈັນ ຮອງຫົວໜ້າກອງບັນຊາການ ປກສ ຫາດຊາຍຟອງ ກ່າວວ່າ: ໃນໄລຍະເດືອນ ພຶດສະພາ 2022 ມີພົນລະເມືອງດີແຈ້ງຕໍ່ເຈົ້າໜ້າທີ່ ປກສ ເມືອງຫາດຊາຍຟອງວ່າ: ມີກຸ່ມຄົນບໍ່ດີເຄື່ອນໄຫວຊື້-ຂາຍຢາເສບຕິດ ຢູ່ຮ້ານອາຫານແຫ່ງໜຶ່ງ ທີ່ຕັ້ງຢູ່ບ້ານ ນາໄຫ ແລະ ຢູ່ເສັ້ນທາງເຂດບ້ານ ດົງໂພນເລົາ ເມືອງ ຫາດຊາຍຟອງ; ຈາກນັ້ນ, ກອງບັນຊາການຈຶ່ງມອບໃຫ້ເຈົ້າໜ້າທີ່ວິຊາສະເພາະລົງເກັບກຳຂໍ້ມູນ ເພື່ອພິສູດແຫຼງຂ່າວ; ຜ່ານການລົງເກັບກຳຂໍ້ມູນເຫັນວ່າມີມູນຄວາມຈິງແທ້ ຈຶ່ງສົມທົບກັບ ພາກສ່ວນທີ່ກ່ຽວຂ້ອງລົງແກ້ໄຂຈຸດເປົ້າໝາຍດັ່ງກ່າວ
ເລື່ອງທີ 1. ໃນເວລາ 22:00 ໂມງຂອງວັນທີ 15 ມິຖຸນາ 2022 ໄດ້ລົງແກ້ໄຂເປົ້າໝາຍທີ່ນັດສົ່ງຊື້-ຂາຍຢາເສບຕິດ ຢູ່ຮ້ານອາຫານແຫ່ງໜຶ່ງເຂດບ້ານ ນາໄຫ ເມືອງ ຫາດຊາຍຟອງ ສາມາດກັກຕົວຜູ້ຖືກໄດ້ 3 ຄົນ ຄື: ທ້າວ ເກດນາລົງ ຫຼື ບີ້ ອາຍຸ 28 ປີ ຢູ່ບ້ານ ສີຖານໃຕ້ ເມືອງຫາດຊາຍຟອງ, ທ້າວ ອາເລັກ ອາຍຸ 22 ປີ ແລະ ທ້າວ ເກມ ອາຍຸ 21 ປີ ທັງສອງຢູ່ບ້ານ ປາກເປັ່ງ ເມືອງ ຫາດຊາຍຟອງ ພ້ອມທັງຢຶດຂອງກາງຢາບ້າຈຳນວນ 1 ແພັກ ມີ 3 ມັດເທົ່າກັບ 6.000 ເມັດ, ໂທລະສັບ 3 ໜ່ວຍ ແລະ ລົດຈັກ 2 ຄັນ.
ເລື່ອງທີ 2. ໃນວັນທີ 17 ມິຖຸນາ 2022 ເວລາ 9:45 ນາທີ ລົງແກ້ໄຂເປົ້າໝາຍທີ່ນັດສົ່ງຊື້-ຂາຍຢາເສບຕິດ ຢູ່ເສັ້ນທາງເຂດບ້ານ ດົງໂພນເລົາເມືອງ ຫາດຊາຍຟອງ ສາມາດກັກຕົວຜູ່ຖືກໄດ້ 2 ຄົນ ຄື: ທ້າວ ສັນຕິ ອາຍຸ 25 ປີ ພັກເຊົາຢູ່ບ້ານ ສະຫວ່າງ ເມືອງ ຫາດຊາຍຟອງ ພ້ອມຂອງກາງຢາບ້າ ຈຳນວນ 10 ແພັກ ມີ 30 ມັດເທົ່າກັບ 60.000 ເມັດ, ໂທລະສັບ 1 ໜ່ວຍ ແລະ ລົດຈັກ MSX ສີແດງ 1 ຄັນ ແລະ ທ້າວດາວັນ ອາຍຸ 21 ປີ ຢູ່ບ້ານນາແສນຄຳ ເມືອງ ໄຊ ແຂວງ ອຸດົມໄຊ ມີໂທລະສັບ 2 ໜ່ວຍ, ຕໍ່ກັບຄະດີທັງສອງເລື່ອງ ເຈົ້າໜ້າທີ່ກຳລັງເລັ່ງສືບສວນ-ສອບສວນຂາຍຫຍາຍຜົນ ເພື່ອຊອກຫາກຸ່ມແກ້ງຮ່ວມຂະບວນການດຽວກັນມາດໍາເນີນຄະດີຕາມຂັ້ນຕອນຂອງກົດໝາຍ.
ທິບພະຈັນ:ຮຽບຮຽງ