ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ພ້ອມຄະນະ ລົງຢ້ຽມຢາມ ການປູກເຂົ້າ 3 ຮອບວຽນຂອງກຸ່ມຊາວນາ ບ້ານນາໂສມ ເມືອງພຽງ ແຂວງ ໄຊຍະບູລີ, ນໍາພາລົງເບິ່ງຕົວຈິງໂດຍ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມພະແນກການທີ່ກ່ຽວຂ້ອງ ໂດຍໄດ້ຮັບການຕ້ອນຮັບ ຈາກ ທ່ານ ເສີດ ແສງສຸລິນ ເຈົ້າເມືອງພຽງ ພ້ອມການນໍາຫລັກແຫລ່ງຂອງເມືອງ.
ໂອກາດນີ້, ທ່ານຮອງນາຍົກລັດຖະມົນຕີ ໄດ້ຮັບຟັງລາຍລະອຽດຂອງການປູກເຂົ້າ 3 ຮອບວຽນ ຈາກກຸ່ມຊາວນາ, ການປູກເຂົ້າ 3 ຮອບວຽນຢູ່ບ້ານນາໂສມ ໄດ້ລິເລີ່ມຈາກການຊີ້ນໍາ-ນໍາພາຂອງການນໍາຂັ້ນແຂວງ, ເມືອງ ແລະ ຄວາມເປັນເຈົ້າການຂອງຂະແໜງກະສິກໍາ ແລະ ປ່າໄມ້ໂດຍສະເພາະແມ່ນຫ້ອງການ ກະສິກໍາ ແລະ ປ່າໄມ້ເມືອງພຽງ, ການປູກເຂົ້າດັ່ງກ່າວແມ່ນໄດ້ຮັບການຊຸກຍູ້ສົ່ງເສີມຈາກບໍລິສັດ ຊົງຢວນ ຈໍາກັດ ແລະ ເລີ່ມປູກທົດລອງໃນປີ 2021 ເປັນຕົ້ນມາ, ມີຊາວນາເຂົ້າຮ່ວມທົດລອງ 33 ຄອບຄົວ, ມີເນື້ອທີ່ 29,94 ເຮັກຕາ. ມາຮອດປັດຈຸບັນແມ່ນຢູ່ໃນຂັ້ນຕອນບົວລະບັດຮັກສາເຂົ້ານາທີ່ປູກຮອບ 2 ແລະ ຈະເກັບກ່ຽວໃນເດືອນກໍລະກົດ ເຊິ່ງ ການປູກຮອບທີ 3 ແມ່ນຈະປູກໃນເດືອນສິງຫາ ແລະ ເກັບກ່ຽວໃນເດືອນ ພະຈິກ 2022. ສ່ວນຮອບທີ 1 ແມ່ນເກັບກ່ຽວແລ້ວໃນເດືອນມີນາຜ່ານມາ, ຜົນຜະລິດໄດ້ 3,88 ໂຕນຕໍ່ເຮັກຕາ ໂດຍຜົນຜະລິດຮອບ 1 ແລະ 2 ແມ່ນຂາຍໃຫ້ບໍລິສັດ ຊີຢວນ ແລະ ຮອບທີ 3 ແມ່ນຊາວນາເກັບໄວ້ກິນ, ແນວພັນເຂົ້າທີ່ນໍາມາປູກແມ່ນ ເຂົ້າຖິ່ນແກ້ວ ມີອາຍຸ 140 ວັນ.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ກໍໄດ້ຍ້ອງຍໍຊົມເຊີຍຕໍ່ການນໍາຂອງແຂວງ, ເມືອງ ແລະ ທຸກພາກສ່ວນ ທີ່ຊຸກຍູ້ສົ່ງເສີມໃນການປູກເຂົ້າ ໂດຍສະເພາະແມ່ນການປູກເຂົ້າ 3 ຮອບວຽນຕໍ່ປີ, ພ້ອມທັງໄດ້ເນັ້ນໜັກໃຫ້ກຸ່ມຊາວນາຈົ່ງເອົາໃຈໃສ່ໃນການບົວລະບັດຮັກສາໃຫ້ຖືກຕາມເຕັກນິກທີ່ວິຊາການໄດ້ແນະນໍາເຊັ່ນ: ການໃສ່ຝຸ່ນ, ການໃຫ້ນໍ້າຢ່າງສະໝໍ່າສະເໝີ. ພ້ອມດຽວກັນກໍຕ້ອງນໍາໃຊ້ເຕັກນິກໃໝ່ແລະ ກົນຈັກທັນສະໄໝເຂົ້າຊ່ວຍໃນການເຮັດນາດັ່ງກ່າວ ເພື່ອຮັບປະກັນຜົນຜະລິດໃຫ້ໄດ້ຕາມແຜນ ແລະ ລື່ນແຜນ, ພາຍຫລັງທີ່ປູກໄດ້ຮັບໝາກຜົນດີແລ້ວ ໃຫ້ຂະຫຍາຍເນື້ອທີ່ປູກອອກໄປສູ່ບ້ານອື່ນໆຕໍ່ໄປ. ຈາກນັ້ນທ່ານຮອງນາຍົກລັດຖະມົນຕີ ກໍໄດ້ໄປຢ້ຽມຢາມຟາມລ້ຽງງົວຂອງບໍລິສັດ ຊີຢວນ ຈໍາກັດ ແລະ ຢ້ຽມຢາມ ກຸ່ມຫັດຖະກໍາຕໍ່າຫູກ ບ້ານ ແສງຈະເລີນ ເມືອງພຽງ ຕື່ມອີກ.
ທິບພະຈັນ:ຮຽບຮຽງ