ຫ້ອງວ່າການສໍານັກງານປະທານປະເທດ (ຫສປທ) ຈັດກອງປະຊຸມ ສະ ຫລຸບການເຄື່ອນໄຫວວຽກງານ ປະຈຳປີ 2021 ແລະ ທິດທາງແຜນການ 2022 ໃນວັນທີ 31 ພຶດສະພາ 2022 ພາຍໃຕ້ການເປັນປະທານຂອງ ທ່ານ ນາງ ປານີ ຢາທໍ່ຕູ້ ຮອງປະທານປະເທດ, ມີພະນັກງານຫລັກແຫລ່ງພາຍໃນ ຫສປທ ເຂົ້າຮ່ວມ.
ທ່ານ ເພັດສະໝອນ ພັນທະວົງ ຮອງຫົວໜ້າຫ້ອງວ່າການສໍານັກງານປະທານປະເທດ ໄດ້ຍົກໃຫ້ເຫັນເຖິງຜົນງານອັນພົ້ນເດັ່ນ ໃນໄລຍະຜ່ານມາ ເຊິ່ງພາຍໃນ ຫສປທ ມີຄວາມສະຫງົບ, ມີຄວາມເປັນລະບຽບຮຽບຮ້ອຍ ແລະ ບັນຍາກາດຟົດຟື້ນ ສາມາດເຮັດໜ້າທີ່ເປັນເສນາທິການຮັບໃຊ້ ໃຫ້ແກ່ປະທານປະເທດ ແລະ ຮອງປະທານປະເທດ ໃນການເຄື່ອນໄຫວລັດຖະກິດ ທັງພາຍໃນ ແລະ ຕ່າງປະເທດໄດ້ຢ່າງດີ; ໄດ້ສຳເລັດກະກຽມຕ້ອນຮັບ ຄະນະຜູ້ແທນຂັ້ນສູງຕ່າງປະເທດ, ໄດ້ສຳເລັດກະກຽມຕ້ອນຮັບການເຂົ້າຢ້ຽມ ຂໍ່ານັບຍື່ນສານຕາຕັ້ງ ຂອງບັນດາເອກອັກຄະລັດຖະທູດຕ່າງປະເທດປະຈໍາ ສປປ ລາວ ແລະ ມອບສານຕາຕັ້ງ ໃຫ້ບັນດາເອກອັກຄະລັດຖະທູດ ແຫ່ງ ສປປ ລາວ ໄປປະຈໍາການຢູ່ຕ່າງປະເທດຫລາຍຄັ້ງ; ສໍາເລັດການຄົ້ນຄວ້າ, ນໍາສະເໜີຕໍ່ທ່ານປະທານປະເທດ ພິຈາລະ ນາລົງລາຍເຊັນລັດຖະບັນຍັດ 2 ສະບັບ; ອອກລັດຖະດໍາລັດປະກາດໃຊ້ກົດໝາຍ 6 ສະບັບ; ໄດ້ຄົ້ນຄວ້າສ້າງເອກະສານກົນໄກ ການປະສານງານລະຫວ່າງ ຫ້ອງວ່າການສໍານັກງານປະທານປະເທດກັບພາກສ່ວນຕ່າງໆ. ນອກຈາກນີ້, ຍັງໄດ້ກວດຜ່ານເນື້ອໃນ ແລະ ຈັດພິມສານອວຍພອນ, ສານຊົມເຊີຍ, ສານເສົ້າສະຫລົດໃຈ ແລະ ໂທລະເລກອວຍພອນ ໃນນາມປະທານປະເທດ ເຖິງຄູ່ຮ່ວມຕໍາແໜ່ງ ແລະ ການນໍາຂັ້ນສູງຂອງບັນດາປະເທດທີ່ມີສາຍພັວພັນການທູດກັບ ສປປ ລາວ ເນື່ອງໃນໂອກາດຕ່າງໆ ແລະ ອື່ນໆ. ພ້ອມນີ້ ຍັງໄດ້ຜ່ານທິດທາງແຜນການເຄື່ອນໄຫວ ປະຈຳປີ 2022 ຕື່ມອີກ.
ໂອກາດນີ້, ທ່ານ ນາງ ປານີ ຢາທໍ່ຕູ້ ໃຫ້ເນັ້ນໃຫ້ ຫສປທ ຮັກສາມູນເຊື້ອ ແລະ ເສີມຂະຫຍາຍ ຈຸດດີທີ່ເປັນພື້ນຖານໃຫ້ມີຜົນດີຂື້ນກວ່າເກົ່າໃນການຈັດຕັ້ງປະຕິບັດວຽກງານໃນປີຕໍ່ໜ້າ; ສືບຕໍ່ຄົ້ນຄວ້າ ແລະ ປັບປຸງພາລະບົດບາດ ກໍຄື ລັດຖະດໍາລັດ ກ່ຽວກັບການຈັດຕັ້ງ ແລະ ການເຄື່ອນໄຫວວຽກງານຂອງ ຫສປທ ໃຫ້ມີຄວາມຈະແຈ້ງ ທາງດ້ານທີ່ຕັ້ງ ແລະ ພາລະບົດບາດ; ເອົາໃຈໃສ່ປັບປຸງກົນໄກປະສານງານກັບພາກສ່ວນກ່ຽວຂ້ອງ; ຍົກສູງພາລະບົດບາດການເປັນເສນາທິການ ໃນການຄົ້ນຄວ້າສັງລວມ ເອກະສານທີ່ສໍາ; ມີການມອບໝາຍວຽກ ໃຫ້ສະມາຊິກພັກ-ພະນັກງານ ຢ່າງຈະແຈ້ງ, ມີການແນະນໍາ, ຊຸກຍູ້ ແລະ ຕິດຕາມກວດກາວຽກງານເປັນປະຈໍາ; ເພີ່ມທະວີປະສິດທິພາບ ແລະປະສິດທິຜົນ ໃນການເປັນເສນາທິການໃຫ້ ປະທານປະເທດ ແລະ ຮອງປະທານປະເທດ ໃນການເຄື່ອນ ໄຫວລັດຖະກິດ ທັງພາຍໃນ ແລະຕ່າງປະເທດ.
ທິບພະຈັນ:ຮຽບຮຽງ