ການແຂ່ງຂັນກີລາບານເຕະ ນັກຮຽນມັດທະຍົມສຶກສາທົ່ວປະເທດ ຮຸ່ນອາຍຸ ບໍ່ເກີນ 17 ປີ ຊິງຂັນທ່ານລັດຖະມົນຕີ ກະຊວງສຶກສາທິການ ແລະ ກີລາ ໃນລາຍການ ໂຄປາ ໂຄຄາ-ໂຄລາ ລາວ 2021 ຄັ້ງທີ IV ເລີ່ມເປີດຂະ ບວນແຂ່ງຂັນຢ່າງເປັນທາງການໃນທ້າຍອາທິດຜ່ານມາ.
ການແຂ່ງຂັນກີລາບານເຕະ ນັກຮຽນມັດທະຍົມສຶກທົ່ວປະເທດ ຄັ້ງທີ IV ໄດ້ເປີດຂຶ້ນຢ່າງເປັນທາງການ ຢູ່ສະໜາມຫຍ້າທຽມ ສະເຕດ້ຽມ ບ້ານໜອງໄຮ ເມືອງຫາດຊາຍຟອງ ນ.ວ ໂດຍການເຂົ້າຮ່ວມເປັນປະທານເປີດງານຂອງ ທ່ານ ວິລະວັນ ບຸນສຸກໄທ ຫົວໜ້າກົມກີລາມວນຊົນ, ພະລະ ແລະ ສິລະປະສຶກສາ ກະຊວງ ສສກ, ທັງເປັນຮອງປະທານຈັດການແຂ່ງ ຂັນ ພ້ອມດ້ວຍບັນດາຄະນະຈັດການແຂ່ງຂັນ, ຄູຝຶກ ແລະ ທີມນັກກີລາເຂົ້າຮ່ວມ.
ທ່ານ ອຳພາວັນ ກວ້າງມະນີວັນ ຮອງຫົວໜ້າກົມກີລາມວນຊົນ, ພະລະ ແລະ ສິລະປະສຶຶກສາ, ກະຊວງ ສສກ ໃນນາມຄະນະຮັບຜິດຊອບຈັດການແຂ່ງຂັນ ໄດ້ລາຍງານວ່າ: ໃນການແຂ່ງຂັນກີລາບານເຕະ ນັກຮຽນມັດທະຍົມສຶກສາທົ່ວປະເທດ ຮຸ່ນອາຍຸບໍ່ເກີນ 17 ປິ ເພື່ອຊິງຂັນທ່ານລັດຖະມົນຕີກະຊວງສຶກສາທິການ ແລະ ກີລາ ໂດຍການສະໜັບສະໜູນຈາກບໍລິສັດລາວ ໂຄຄາ-ໂຄລາ ຈຳກັດ ເຊິ່ງການແຂ່ງຂັນໄດ້ແບ່ງອອກເປັນ 3 ໄລຍະຄື: ແຂ່ງຂັນຮອບຄັດເລືອກ ຢູ່ນະຄອນຫຼວງວຽງຈັນ ໃນຮູບແບບແຂ່ງຂັນພາຍໃນເມືອງຂອງ 9 ຕົວເມືອງ ເພື່ອຄັດເລືອກເອົາອັນດັບທີ 1 ຂອງແຕ່ລະເມືອງ ເຂົ້າມາແຂ່ງຂັນຄັດເລືອເອົາ 4 ທີມຊາຍ ແລະ 4 ທີມຍິງ ເປັນຕົວແທນຂອງນະຄອນຫຼວງວຽງຈັນ ເຂົ້າຮ່ວມແຂ່ງຂັນໃນຮອບທົ່ວປະເທດ, ສ່ວນຮອບຄັດເລືອກຂອງແຂວງຕ່າງໆ ຕາມແຜນເຂດພາກເໜືອແຂ່ງຂັນຄັດເລືອກທີ່ ແຂວງຫຼວງພະບາງ. ໃນນັ້ນ ເຂດພາກກາງ ແລະ ພາກໃຕ້ ແມ່ນແຂ່ງຂັນຄັດເລືອກທີ່ແຂວງຈຳປາສັກ, ແຕ່ເນື່ອງຈາກສະ ພາບການລະບາດຂອງພະຍາດໂຄວິດ-19 ເວລານັ້ນມີການເພີ່ມທະວີໃນຫຼາຍແຫ່ງຂອບເຂດທົ່ວປະເທດ, ຄະນະຮັບຜິດ ຊອບ ຈຶ່ງໄດ້ເລື່ອນການຈັດການແຂ່ງຂັນກີລາບານເຕະດັ່ງກ່າວ ຢ່າງບໍ່ມີກຳນົດ ຈົນມາຮອດປັດຈຸບັນ ສະຖານະການການລະບາດຂອງພະຍາດໂຄວິດ ເບົາບາງລົງ, ຄະນະຈັດການແຂ່ງຂັນ ຈື່ງໄດ້ປັບຮູບແບບ ໂດຍຄັດເລືອກບັນດາແຂວງ ໃນຮູບແບບການແຈ້ງເຊີນແຂວງທີ່ມີເງື່ອນໄຂ ແລະ ມີຄວາມພ້ອມ ເພື່ອເຂົ້າຮ່ວມການແຂ່ງຂັນຮອບສຸດທ້າຍ ລວມມີທີມເຂົ້າແຂ່ງທັງໝົດ 20 ທີມ, ໃນນັ້ນ ທີມຊາຍ 12 ທີມຄື: ມສ ນາຊາຍທອງ (ເມືອງ ນາຊາຍທອງ). ມສ ນາຝາຍ (ເມືອງ ປາກງື່ມ). ມສ ຫວງຽນຢູ (ເມືອງ ຈັນທະບູລີ). ມຕ ບໍ່ໂອ (ເມືອງ ຫາດຊາຍຟອງ) ຈາກ ນະຄອນຫຼວງ. ແຂວງບໍ່ແກ້ວ, ອຸດົມໄຊ. ຫຼວງພະບາງ. ແຂວງ ວຽງຈັນ. ບໍລິຄຳໄຊ. ສະຫວັນນະເຂດ. ສາລະວັນ ແລະ ແຂວງ ຈຳປາສັກ, ສ່ວນທີມຍິງ ມີ 8 ທີມຄື: ມສ ໂຄກສີວິໄລ (ເມືອງ ໄຊທານີ). ມສ ນ້ຳສັງ (ເມືອງ ສັງທອງ). ມສ ໂພນທັນ (ເມືອງ ໄຊເສດຖາ). ມຕ ບໍ່ໂອ (ເມືອງ ຫາດຊາຍຟອງ) ຈາກນະຄອນຫຼວງ. ນອກນັ້ນ ຍັງມີແຂວງ ຫຼວງພະບາງ. ຊຽງຂວາງ. ແຂວງ ວຽງຈັນ ແລະ ແຂວງ ຄຳມ່ວນ
ການແຂ່ງຂັນຄັ້ງນີ້ ແມ່ນຈະນຳໃຊ້ 2 ສະໜາມແຂ່ງຂັນຄື: ສະໜາມຫຍ້າທຽມລ້ານຊ້າງ ສະເຕດ້ຽມ ແລະ ສະໜາມກີລາບານເຕະ ຂອງສະຖາບັນກິລາ-ກາຍຍະກຳ ເລີ່ມແຕ່ວັນທີ 14 ພຶດສະພາ ແລະ ຈະໄປສິ້ນສຸດການແຂ່ງຂັນ ໃນວັນທີ 21 ພິດສະພາ 2022 ຊຶ່ງເປັນມື້ຊິງຊະນະເລີດ
ຂ່າວ: ສົມສະນິດ
ພາບ: ເດດ