ວັນທີ 9 ພຶດສະພາ 2022, ເວລາ 21:00 ໂມງ ເຈົ້າໜ້າທີ່ ກອງພັນປ້ອງກັນເຄື່ອນທີ່ ປກສ ນວ ອອກເຄື່ອນໄຫວກວດລາດຕະເວນ 04 ເມືອງໃນ ແລະ ຈຸດຫຼໍ່ແຫຼມຕ່າງໆ ພໍມາຮອດເຂດບ້ານ ທາດຫຼວງ ເມືອງໄຊເສດຖາ ນະຄອນຫຼວງວຽງຈັນ ພົບເຫັນຊາຍ 01 ຄົນ, ຢືນຢູ່ໜ້າຮ້ານເກມແຫ່ງໜຶ່ງ ມີພຶດຕິກໍາຕ້ອງສົງໃສ ເຈົ້າໜ້າທີ່ຈຶ່ງໄດ້ຂໍເຂົ້າກວດຄົ້ນ ພົບເຫັນຢາເສບຕິດ ( ຢາບ້າ ) ຈຳນວນ 17 ເມັດ ຈິ່ງຈັບຕົວຜູ້ກ່ຽວມາສອບສວນ.
ເບື້ອງຕົ້ນຊາບ ຊື່ວ່າ: ທ້າວ ຄໍາຈັນ ອາຍຸ 40 ປີ, ກໍາມະກອນ, ຢູ່ບ້ານສີບຸນເຮືອງເມືອງຈັນທະບູລີ ນະຄອນຫຼວງວຽງຈັນ ຜູ້ກ່ຽວຮັບສາລະພາບວ່າ: ຢາບ້າ 17 ເມັດ ເປັນຂອງຜູ້ກ່ຽວເຈົ້າໜ້າທີ່ ກອງພັນປ້ອງກັນເຄື່ອນທີ່ ຈິ່ງໄດ້ນຳສົ່ງເຄື່ອງຂອງກາງ ໃຫ້ພະແນກສະກັດກັ້ນ ແລະ ຕ້ານຢາເສບຕິດ ນະຄອນຫຼວງວຽງຈັນ ດຳເນີນຄະດີ ຕາມລະບຽບກົດໝາຍ.
ດັ່ງນັ້ນຈຶ່ງຂໍຮຽກຮ້ອງມາຍັງທຸກຄົນໃນສັງຄົມ ຖ້າພົບເຫັນເຫດການທີ່ມີຄວາມສ່ຽງກໍ່ໃຫ້ເກີດປະກົດການຫຍໍ້ທໍ້ຕ່າງໆ ແຈ້ງເຈົ້າໜ້າທີ່ໃກ້ຄຽງ ຫຼື ອໍານາດການປົກຄອງບ້ານ.
ທິບພະຈັນ: ຮຽບຮຽງ